Բոլթոնը հակահայ, թուրքասեր քաղաքական գործիչ էր, բայց ոչինչ չի փոխվի

Սպիտակ տան ամենաազդեցիկ պաշտոնյաներց մեկը՝ Ազգային անվտանգության գծով խորհրդական Ջոն Բոլթոնը լքել է Թրամփի վարչակազմը։ Ինչպիսի ազդեցություն կունենա սա ԱՄՆ տարածաշրջանային քաղաքականության վրա։ Այս, ինչպես նաև Հայաստանի ներքաղաքական զարգացումների մասին, լրագրողների հետ հանդիպմանը խոսեց քաղաքագետ Սերգեյ Շաքարյանը:

 «Հրաժարական է տվել հակահայ, թուրքասեր քաղաքական գործիչը»,- ասում է Շաքարյանը: Ըստ բանախոսի՝ մենք ուրախանալու խնդիր չունենք, ինչքան էլ, որ նա հայամետ գործիչ չէր:

«Բոլթոնի հրաժարականը այս պահին ոչինչ չի փոխի, գուցե շատ չնչին, ձևական փոփոխություններ լինեն: Բոլթոնն ընդամենն անձ է, ով իրականացնում է արդեն որոշված ռազմավարությունը»,- ասում է քաղաքագետը:

Ըստ բանախոսի՝ այս պահին ԱՄՆ-ի համար Իրանի հետ հարաբերություններն ավելի կարևոր են: Գուցե Հայաստանի հանդեպ էլ քաղաքականությունը փոխվի, բայց դա շատ շուտ չի լինի,- ասում է նա:

Շաքարյանը կարծում է, որ ԱՄՆ-ում նոր հակաթրամփյան ալիք կսկսվի:

 Բանախոսն անդրադարձավ նաև Ռ. Քոչարյանի դատավարությանը: «Մեր իշխանությունները թատրոն են խաղում՝ փորձելով ժամանակ շահել,- ասում է քաղաքագետը: Նա կարծում է, որ սեպտեմբերի 17-ին դժվար թե որոշում կայացվի: Ըստ օրենքի՝ Քոչարյանը վաղուց պետք է ազատության մեջ լիներ»,- կարծում է Շաքարյանը:

Բոլթոնի հրաժարականի մասին հայտնի դարձավ երեքշաբթի երեկոյան: Իր առանցքային խորհրդականներից մեկի պաշտոնանկության մասին Միացյալ Նահանգների նախագահ Դոնալդ Թրամփը հայտնեց Twitter-ում՝ որոշելով չխախտել ձևավորված ավանդույթը:

«Երեկ երեկոյան ես տեղեկացրեցի Ջոն Բոլթոնին, որ Սպիտակ տունը իր կարիքն այլևս չունի: Ինչպես և իմ վարչակազմի բազմաթիվ ներկայացուցիչներ, ես ևս կտրականապես համաձայն չէի նրա շատ առաջարկներին: Այս իսկ պատճառով ես խնդրեցի նրան հրաժարական ներկայացնել, ինչն էլ նա արել է այսօր առավոտյան»,- գրել էր Թրամփը: