Նիկոլ Փաշինյանը ներկայացրեց համահայկականության գաղափարը

Հայաստանի Հանրապետության վարչապետ Նիկոլ Փաշինյանը Լոս Անջելեսում տեղի ունեցած հանրահավաքի ընթացքում ունեցած ելույթում ներկայացրեց համահայկականության գաղափարը:

«Օգոստոսի 5-ին Ստեփանակերտում տեղի ունեցած հանրահավաքում ես խոսեցի համահայկականության գաղափարի մասին: Ես համոզված եմ՝ ձեզնից շատերը, եթե ոչ բոլորը, հետևել են այդ իրադարձությանը, և ես չեմ ուզում կրկնել այն ամենը, ինչ ասել եմ այնտեղ: Ուզում եմ ավելացնել դրան՝ ի՞նչ է նշանակում համահայկականության գաղափարը: Սա նշանակում է, որ աշխարհի բոլոր հայերը առանց կտրվելու իրենց առօրյայից, իրենց կյանքից, իրենց գործունեությունից , պետք է արձանագրեն և պետք է կամք ցուցաբերեն՝ գործել ի շահ Հայաստանի և գործել ի շահ Արցախի: Ես ուզում եմ ընդգծել, որ իմ այս խոսքն ուղղված է ամբողջ սփյուռքին՝ Ամերիկայում, Եվրոպայում, Ասիայում: Ի՞նչ է սա նշանակում գործնականում: Սա ամենևին չի նշանակում գործել ընդդեմ իրենց բնակության վայր հանդիսացող երկրի և հօգուտ Հայաստանի: Իմ ասածը պետք է արտահայտվի նրանում, որ այդ երկրներում ապրող մեր հայրենակիցները իրենց ջանքերը պետք է գործադրեն այդ երկրների և Հայաստանի միջև բարեկամական կապերի ամրապնդմանը, Հայաստանի նոր ընկալման հանրահռչակմանը և քարոզչությանը: Այո, ինչպես մենք միասին կերտել ենք Հայաստանի նոր իմիջը, այդպես էլ մենք պետք է շարունակենք Նոր Հայաստանի հանրահռչակումը կամ ինչպես ընդունված է ասել՝ promotion-ը: Եվ ես հույս ունեմ, որ ձեզնից յուրաքանչյուրը, աշխարհի յուրաքանչյուր հայ կդառնա… ձեզնից շատ շատերն այսօր էլ, միշտ են այդպես եղել իրենց ողջ կյանքի և գործունեության ընթացքում, բայց ես հույս ունեմ, որ աշխարհի 10 մլն հայությունը կդառնա Հայաստանի թույլ տվեք այդպես էլ ասել promoter-ը, որովհետև Հայաստանը բոլորիս երկիրն է և Հայաստանը մեր բոլորի հայրենիքն է»,- նշեց Փաշինյանը:

Նա հույս հայտնեց, որ Հայաստանում տեղի ունեցած իրադարձություններից հետո հայ երիտասարդության շրջանում կաճի հետաքրքրությունը Հայաստանի նկատմամբ: «Ինձ արդեն ասել են, որ այդ երևույթը տեղ ունի արդեն, որ հարյուրավոր, հազարավոր հայեր, հայ երիտասարդներ Ամերիկայում, ամենուր, որոնք նույնիսկ հայերեն սկսել էին չխոսել, հեղափոխությունից հետո սկսել են ավելի շատ հետաքրքրվել իրենց հայրենիքով, իրենց ինքնությունով ու իրենց պատմությամբ, և մենք, ցանկանալով երիտասարդության ուշադրությունը հրավիրել այս նոր իրավիճակի վրա, մի այսպիսի ասացվածք կամ կարգախոս ենք մտածել նրանց համար՝ ասելով, որ սիրելի հայրենակիցներ՝ հայ լինելը հետաքրքիր է, և մենք իրար հետ պետք է հայ լինելը ավելի ու ավելի հետաքրքիր դարձնենք, որովհետև հայ լինելն իսկապես հետաքրքիր է, որովհետև հայ ժողովուրդը ոչ միայն մեծ անցյալ ունի, ոչ միայն մեծ ներկա ունի, այլև շատ ավելի մեծ ապագա ունի և մենք այսօր իրար հետ կերտում ենք այդ ապագան»,- ասաց ՀՀ վարչապետը: