23 օր ջուր չի եղել, թե որն է խնդիրը, դեռ չգիտեն

Այսօր ՀՀ կառավարության շենքի դիմաց բողոքի ցույց էին կազմակերպել Արմավիր համայնքի Գետաշեն գյուղի բնակիչները, ովքեր բողոքում էին ջրամատակարարման որակից։ Խնդրի մանրամասները պարզելու համար ԼՈՒՐԵՐ․com-ը զրուցեց գյուղապետ Գագիկ Հովհաննիսյանի հետ։

«Սամվել Մուրադյանը մեր համայնքում ունի 100 հեկտար հողատարածք։ Նա ասում է, թե 72 հեկտարը առանց ջրելու է մնացել։ Էդպես չի կարող լինել։ Հնարավոր է՝ 10 կամ 12 հեկտարը մնա առանց ջրի, բայց ոչ ավելի շատ»,- նշեց գյուղապետը։

Ըստ Հովհաննիսյանի՝ իրենք այդ հատվածի ջրամատակարարումը ապահովելու հետ կապված միշտ խնդիր են ունեցել, քանի որ տեղանքը անհարմար է ու ռիսկային։

Գյուղապետը չի բացառում, որ գուցե Մուրադյանը չի ստում՝ ասելով, թե 23 օր ջուր չի եղել, բայց ինքը չի կարող պատասխանել, թե որն է եղել պատճառը։ Միևնույն ժամանակ գյուղապետը բացառում է, որ 72 հեկտարը չի ջրամատակարարվել։

«Մենք ունենք ջրամատակարարման հստակ ծրագիր՝ հողատարածքի ամեն հատվածում երեք օրը մեկ է ջուր լինում։ Եվ այդ հատվածում 300 հեկտար հողատարածք կա, միայն Սամվել Մուրադյանինը չէ։ Ու քանի որ ջրի քանակի խնդիր է եղել, արդյուքում չի մատակարարվել Մուրադյանի հողատարածքը»,- նշեց գյուղապետը։

Ըստ գյուղապետի՝ ինքը կողմ է խնդրի պարզաբանման համար հանձնաժողովին ստեղծմանը․ «Թող բերեն իրենց մասնագետներին։ Մենք էլ կարող ենք ստեղծել հանձնաժողով, քանի որ գյուղապետարանում համապատասխան մարդիկ կան։ Բայց թող դրսից մասնագետներ լինեն, ովքեր կպարզաբանեն, թե ինչից է բերքը փչացել, արդյո՞ք ջուրն է խնդիրի պատճառը, թե՞ ուրիշ խնդիրներ կան»։

«Այսօր բողոքի ցույցին մասնակցած բնակիչները մեր  գյուղի բնակիչներն են, բայց աշխատում են Մուրադյանի մոտ։ Մենք գյուղում, ընդհանուր առմամբ, ջրի խնդիր չունենք, բայց կա հատված, որտեղ ջրի խնդիր է եղել, բայց այդ խնդիրները լուծվել են։ Այդ հատվածում ջրամատակարարման խնդիր լինում է, այս պահին էլ այնտեղ ջուր չկա»,- խոսքն ամփոփելով՝ ասաց գյուղապետ։