«Իմ քայլը» հիմնադրամը դասական երաժշտության ստեղծագործական խմբերին ֆինանսավորել է 672 մլն դրամով

«Իմ քայլը» բարեգործական հիմնադրամը մոտ 672 մլն դրամ է հատկացրել դասական երաժշտության ստեղծագործական խմբերին. արդյունքում  կազմակերպվել է 108 համերգ են, որից 13-ը` արտերկրում` 70 հազար հանդիսատեսի առջև: Lրագրողների հետ հանդիպմանը այս մասին ասաց հիմնադրամի մշակութային ծրագրերի համակարգող Լիլիթ Գրիգորյանը:

«Մինչ այժմ աշխատել ենք 4 ուղղությամբ` դասական երաժշտության կայուն զարգացում, մշակութային տուրիզմի զարգացում, մարզային մշակութային տների հզորացում և աջակցություն այլ ծրագրերի, նախաձեռնությունների: Բեռլինի ֆիլհարմոնիկի բարեկամների խմբի օրինակով ստեղծել ենք Հայաստանի դասական երաժշտության բարեկամների խումբ: Ֆինանսավորում ենք Հայաստանի ազգային ֆիլհարմոնիկ նվագախմբին, պետական սիմֆոնիկ նվագախմբին, պետական կամերային երգչախմբին, պետական կամերային նվագախմբին, Կոմիտասի անվան ազգային քառյակին, «Հովեր» պետական կամերային երգչախմբին, Հայաստանի ազգային ակադեմիական երգչախմբին, «Երևանյան հեռանկարներ» միջազգային երաժշտական փառատոնին: Լուծում ենք դրանց պահպանման ծախսերը:  Բայց նաև հասկանում ենք, որ դրանով հարցը չի լուծվում, քանի որ պահպանման ծախսերով չի կարելի զարգացման գալ: Մեր հաջորդ քայլը ներզարգացման ծրագիրն է»,-ասաց Գրիգորյանը:

 Գրիգորյանի խոսքով` ավելի վաղ «Իմ քայլը» հիմնադրամի և դասական երաժշտության ստեղծագործական խմբերի միջև համագործակցության հուշագրի ստորագրումը միայն ծրագրի սկիզբն է: Հուշագրի ստորագրմամբ Հայաստանի ազգային ֆիլհարմոնիկ նվագախմբին, պետական սիմֆոնիկ նվագախմբին, պետական կամերային երգչախմբին, պետական կամերային նվագախմբին, Կոմիտասի անվան ազգային քառյակին, «Հովեր» պետական կամերային երգչախմբին, Հայաստանի ազգային ակադեմիական երգչախմբին, «Երևանյան հեռանկարներ» միջազգային երաժշտական փառատոն ՀԿ-ն և Օպերայի և բալետի ազգային ակադեմիական թատրոնը հիմնադրամի հետ համաձայնել են համագործակցել, որ ծրագիրն ի կատար ածվի: Ծրագիրն ունի երեք փուլ: «Առաջինը միասնական հարթակի ստեղծումն է, կլինի միասնական օրացույց, որտեղ կներառվեն մշակութային միջոցառումները, տոմսերի վաճառքը: Երկրորդ կետը հետազոտություն է, որ հասկանանք պահանջարկ-առաջարկի խնդիրը, որակական վիճակը, վերջում պետք է իրենց օգնենք կարողությունների զարգացման, տոմսային քաղաքականության վերանայման համար»,-ասաց Գրիգորյանը:

Հիմնադրամը 8 շահառուներին սկսել է ֆինանսավորել 2018-ի նոյեմբերից, իսկ Հայաստանի պետական ջազ նվագախմբին` հունիսի 1-ից: Այսօրվա դրությամբ հիմնադրամը ծախսել է մոտ 672 մլն դրամ: Արդյունքում ծրագրի շահառուները այս 6 ամսում կազմակերպել են 108 համերգ, որից 13-ը` արտերկրում` 70 հազար հանդիսատեսի դիմաց: