Ընտրողը հետաքրքրվել է թեկնածուից՝ որքա՞ն է նա պատրաստ վճարել 10 ձայնի համար. «Անկախ դիտորդ»

«Անկախ դիտորդ» հասարակական դաշինքը հայտնում է 19 համայնքերում ՏԻՄ ընտրությունների դիտորդության ժամանակ արձանագրված խախտումների մասին։

«Փարաքար համայնքում, որտեղ համայնքի ղեկավարի պաշտոնի համար են պայքարում 4 թեկնածու՝ ներկայիս համայնքապետը, երկու ավագանիի անդամներ եւ համայնքապետի նախկին տեղակալը, քարոզչությունը որոշ իմաստով շարունակվել է ընտրությունների օրը՝ Դավիթ Մինասյանի պաստառներով մեքենան կայանվել էր տեղամասերից մեկի դիմաց, սակայն հեռացվել է դիտորդի եւ հանձնաժողովի նախագահի հորդորով։ Մեկ այլ տեղամասում Սամվել Վարդանյանի վստահված անձը ընտրողներին բարձրաձայն կոչ է արել քվեարկել Վարդանյանի օգտին։

Ուշադրություն գրավող է եղել Փարաքար եւ Թաիրով համայնքներով շրջող սպիտակ Hummer մակնիշի ավտոմեքենան, որը կարծես կատարում է թեկնածուներից մեկի շրջիկ շտաբի դերը։

Նույնպես Փարաքար համայնքում արձանագրվել է ընտրողին օգնելու չարաշահման դեպք, երբ տեղամասային կենտրոն տարեց կնոջը բերած երիտասարդը քվեարկությունը կատարել է չսպասելով կնոջ քվեախցիկ մտնելուն եւ հեռացել՝ «տատիկին» թույլ տալով ինքնուրույն հեռանալ տեղամասից։

Ծանոթ արատավոր պրակտիկայի եւս մի օրինակի է ականատես եղել մեր դիտորդը Արեւաբույր համայնքում․ տեղամասի մոտակայքում ընտրողը հետաքրքրվել է թեկնածուից՝ որքա՞ն է նա պատրաստ վճարել 10 ձայնի համար։ Գուցե դիտորդի ներկայությունը նկատելով թեկնածուն առաջարկել է ընտրողին վճարել «հարգանքով»։

Արտաշատ համայնքում նույնպես արձանագրվել են քարոզչության կանոնների խախտումներ, որոնք սակայն վերացվել են։ Տարածված է տեղամասային կենտրոնի տարածքում կամ քվեարկության սենյակում ոստիկանների կամ կողմնակի անձանց (դպրոցի պահակ եւն, եւն) ներկայությունը։

Որոշ տեղամասերում նկատվել են ԶԼՄ-ներկայացուցիչներ, որոնք չունեին ԿԸՀ֊ի կողմից տրված հավատարմագիր(5-րդ ալիք, Շանթ) կամ ընդհանրապես հավատարմագրված չէին որպես լրատվամիջոց (Թերթ.am, Հայկական Ժամ)։

Զարթոնք համայնքում տեղամասի շրջակայքից բերման է ենթարկվել այլ համայնքի մի բնակիչ, ով վիրավորական արտահայտություններ էր հասցնում ոստիկանների նկատմամբ՝ ի պատասխան տարածքից հեռանալու իրենց պահանջի»,–հայտնում է դաշինքը։