Սկեսուրի կողմից խոշտանգված հարսի գործով դատավարությունը վաղն է

Օգոստոսի 2-ին ժամը 12:00-ին «Ընդդեմ Կանանց Նկատմամբ Բռնության» կոալիցիան կազմակերպում է ցույց՝ Մարիամ Գևորգյանի գործով Արարատի և Վայոց Ձորի մարզերի Ընդհանուր իրավասության դատարանի(ք.Արտաշատ) առջև, ուր և կընթանա դավատարությունը:

Հիշեցնենք, որ Մարիամի սկեսուրը Հայկանուշ Միքայելյանը իր որդու՝ Դավիթ Զիրոյանի հետ միասին խոշտանգումների է ենթարկել Մարիամ Գևորգյանին: Մ.Գևորգյանը Զիրոյանի հետ ամուսնացել է 2009 թվականի նոյեմբերին, նույն տարվա դեկտեմբերին մեկնել է Սանկտ Պետերբուրգ, որտեղ աղջկան 10 ամիսների ընթացքում խոշտանգումների են ենթարկել: Սկեսուրն իր հարսին դաժան ծեծի է ենթարկել. արդուկով այրել մարմինը, կրակայրիչով՝ լեզուն, պատառաքաղով ծակծկել մարմինը, ջարդել քիթը, արգելել լողանալ, լվացվել և մշտապես անկյուն է կանգնեցրել՝ նրան պատճառելով մարմնական վնասվածքներ և հոգեկան ծանր ապրումներ։

Նման վերաբերմունքի է արժանացել նաև Հայկանուշ Միքայելյանի որդու՝ Դավիթ Զիրոյանի առաջին կինը, որին ի վերջո կուրացրել են։ Երկու հարսներն էլ դիմել են ոստիկանություն։ Հայկանուշ Միքայելյանին այս տարվա հունվարի 21-ից հետախուզում էր Ոստիկանության Արտաշատի բաժինը՝ ՀՀ Քրեական օրենսգրքի 112 հոդվածի 2-րդ մասով նախատեսված մեղադրանքով»։ Երևան վերադառնալուց հետո Գևորգյանը դիմել է ոստիկանություն, ամուսնուն մեղադրանք է առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծ» հոդվածներով, որի համաձայն նրան կարող էին դատապարտել մինչև 3 տարվա ազատազրկման:

Քննիչի որոշմամբ՝ Զիրոյանն ազատ է արձակվել՝ Հայաստանի Հանրապետության 20-ամյակի կապակցությամբ, ՀՀ նախագահի կողմից հայտարարված համաներմամբ: Հայկանուշ Միքայելյանի դեմ առաջադրված է մեղադրանք ՀՀ քրեական օրենսգրքի 113 (միջին ծանրության վնասվածնքեր հասցնել) և 119 (խոշտանգում) հոդվածներով։