Գավառի պոլիկլինիկան անտեսում է Կառավարության որոշումը

Կառավարության համապատասխան որոշման համաձայն՝ «Շաքարային դիաբետ» հիվանդության առկայության դեպքում ամբուլատոր–պոլիկլինիկական բուժհիմնարկներում հիվանդներին դեղերը տրվում են անվճար, մեկ այլ որոշման համաձայն, եթե կենսաթոշակառուն ընդգրկված է սոցիալապես անապահով խմբերի ցանկում, ապա իրավունք ունի օգտվելու 50% զեղչով դեղեր ձեռք բերելու արտոնությունից:

Սակայն Գավառի պոլիկլինիկայում Օլյա Հայրապետյանին, ով տառապում է շաքարային դիաբետով և ունի սրտի հետ կապված խնդիրներ, անտեսելով Կառավարության որոշումները՝ մերժել էին դեղեր տրամադրել՝ պատճառաբանելով, որ չունեն:

Պաշտպանի միջնորդությամբ իր իրավունքները վերականգնելու նպատակով, տիկին Հայրապետյանը այցելել էր Պաշտպանի աշխատակազմի Գեղարքունիքի տարածքային գրասենյակ:

Օլյա Հայրապետյանի խնդիրների հետ կապված Առողջապահության նախարարությանն ուղղված Պաշտպանի մի քանի գրությունների արդյունքում Գավառի պոլիկլինիկան տիկին Հայրապետյանին ոչ միայն տրամադրել է նրան օրենքով հասանելիք անվճար դեղերը, այլև ընդգրկել սոցիալապես անապահով խմբի համար նախատեսված 50% զեղչով դեղեր ձեռքբ բերելու արտոնությունների ցանկում:

Օլյա Հայրապետյանը իր շնորհակալությունն է հայտնել Մարդու իրավունքների պաշտպան Կարեն Անդրեսյանին և Պաշտպանի աշխատակազմի Գեղարքունիքի տարածքային գրասենյակի աշխատակիցներին իր խնդրի լուծման հարցում պատրաստակամություն դրսևորելու համար: