«Հարսնաքար»-ի գործով կալանավորվածների մեղադրանքները վերավորակվել են

Ոստիկանությունը վերաորակավորել է «Հարսնաքար»-ի գործով վեց կալանավորվածների մեղադրանքները: Այս մասին Lurer.com-ի հայտնեցին Ոստիկանության հասարակայնության հետ կապի և լրատվության վարչությունից:

Նախկինում կալանավորվածներին առաջադրված էր մեղադրանքներ մեկ հոդվածի հատկանիշներով, իսկ այժմ՝ երեք: Վերարոակման մասին որոշումը կայացվել է հուլիսի 31-ին:

Կարևոր տարբերությունն այն է, որ, եթե նախկինում մեղադրանքն ուներ «դիտավորությամբ առողջությանը ծանր վնաս պատճառելը» ձեւակերպումը, ապա նոր ձևակերպումն է՝ «դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահ»:

Լարտվության վարչությունից մեզ հայտնեցին նաև, որ տարբերություններից մեկն էլ այն է, որ կփոփոխվի նաև պատժաչափը: «Քանի որ ավելացել են երկու հոդվածներ, ենթադրվում է, որ այդ հոդվածների համար նախատեսված պատժաչափերը կգումարվեն ու կառաջարկվի ավելի երկար պատժաչափ»:

Վահե Ավետյանի մասով նոր՝ խստացված մեղադրանքը առաջադրվել է բոլոր վեց կալանավորվածներին:

Նախկինում կալանավորվածներին մեղադրանքն առաջադրված էր Քրեական օրենսգրքի 112-րդ հոդվածի 2-րդ մասի 1-ին և 6-րդ կետերով, իսկ այժմ՝ 112-րդ հոդվածի 2-րդ մասի 6-րդ և 14-րդ կետերով (Դիտավորությամբ առողջությանը ծանր վնաս պատճառելը , որը կատարվել է մի խումբ անձանց, կազմակերպված խմբի կողմից, (6-րդ կետ) և անզգուշությամբ առաջացնելով տուժողի մահ՝, (14-րդ կետ) պատժվում է ազատազրկմամբ՝ հինգից տասը տարի ժամկետով), 113-րդ հոդվածի 2-րդ մասի 1-ին և 3-րդ կետերով (Դիտավորությամբ առողջությանը միջին ծանրության վնաս պատճառելը
1) երկու կամ ավելի անձանց նկատմամբ, 3) մի խումբ անձանց կամ կազմակերպված խմբի կողմից: Պատժվում է ազատազրկմամբ՝ առավելագույնը հինգ տարի ժամկետով), ինչպես նաև 118-րդ հոդվածով (Ծեծելը կամ այլ բռնի գործողություններ կատարելը, որը չի առաջացրել սույն օրենսգրքի 117-րդ հոդվածով նախատեսված հետեւանքներ՝ պատժվում է տուգանքով՝ նվազագույն աշխատավարձի առավելագույնը հարյուրապատիկի չափով, կամ ուղղիչ աշխատանքներով՝ առավելագույնը մեկ տարի ժամկետով, կամ կալանքով՝ առավելագույնը երկու ամիս ժամկետով):

Մեղադրանքի փոփոխման հիմք է հանդիսացել այն, որ մարմնական վնասվածքի հետևանքով Վահե Ավետյանը մահացել է, և որ դատաբժշկական փորձաքննությամբ պարզել են, որ 5 տուժողներից երկուսին՝ Արտակ Բայադյանին ու Գարիկ Սողոմոնյանին, պատճառվել է միջին ծանրության մարմնական վնասվածք, իսկ մյուս երկուսի՝ Արկադի Աղաջանյանի ու Էդգար Նիկոյանի մոտ մարմնական վնասվածքներ չեն հայտնաբերվել: