Ինչու՞ փաստաբանները պատշաճ կերպով չեն ծանուցվել

Այսօր «Պահանջում ենք պատժել Հարսնաքարի միջադեպի բոլոր մեղավորներին» քաղաքացիական նախաձեռնությունը Ոստիկանության շենքի առջև կազմակերպել էր բողոքի ակցիա, որով պահանջում էր անհապաղ իրենց տրամադրել «Հարսնաքարի» գործով բոլոր փաստաթղթերն ու նյութերը, որոնց Քրեական դատավարության օրենսգրքի ուժով իրենք ունեն ծանոթանալու իրավունք:

Ակցիայի ժամանակ փաստաբան Լուսինե Հակոբյանը մասնավորապես նշեց. «Ես դեռևս չեմ կարող ասել՝ ինչ ընթացքում է գործը, քանի որ մենք առ այս պահը չենք ծանոթացել գործի նյութերին։ Ոստիկանությունը հայտարարություն էր տարածել այն մասին, որ իրենք մեզ գրություն են ուղարկել հուլիսի 27-ին, որով օգոստոսի 1-ին հրավիրում են ծանոթանալու գործի նյութերին։ Փաստն այն է, որ այդ ծրարը քննիչի կողմից հանձնվել է փոստին հուլիսի 30-ին մոտ ժամը 3-ին և մենք փոստը ստացել ենք օգոստոսի 1-ին ժամը 5-ին։ Զարմանալի է, թե մենք ինչպես էինք ժամը 5-ին գնալու և ծանոթանալու նյութերին։ Ինչ վերաբերում է հեռախոսազանգերին մեզ ծանուցելուն, նույն քննիչ Ռուբեն Մկրտչյանը ամսի 27-ին տեղեկացրել է, որ հեռախոսով շփվելու ռեժիմն իր համար անընդունելի է, և գործի նյութերին ծանոթանալու մասին ինքը կտա գրավոր պատասխան։ Այսօր մենք ստացել ենք քննիչի ծանուցագիրը, այն մասին, որ մենք երեկ՝ ժամը 5-ին, հրավիրվել ենք ծանոթանալու գործի նյութերին։ Մենք հնարավորինս արագ կփորձենք ծանոթանալ, սակայն մեր պահանջները արդեն փոխվել են. մենք պահանջում ենք, որ մեզ տրամադրեն գործի ամբողջ նյութերը»։

Ակցիայի կազմակերպիչ և մասնակից հրապարակախոս Զարուհի Հովհաննիսյանը, անդրադառնալով ակցիայի պահանջին, մասնավորապես նշեց. «Ակցիան մենք կազմակերպել ենք, քանի որ ունենք տվյալներ, որ խոչընդոտվում է փաստաբաների աշխատանքը։ Փաստաբաներին չեն տրամադրվում այն փաստաթղթերը, որոնք անհրաժեշտ են իրենց աշխատանքի համար և մենք եկել ենք հիշեցնելու, որ հանրային ուշադրության կենտրոնում է այս գործը և մենք հետամուտ ենք լինելու, որպեսզի բացահայտվեն այս գործում բոլոր մեղավորները»։

Զարուհի Հովհաննիսյանի խոսքերով՝ մեղադրական հոդվածի վերաորակումը խեղկատակություն է, քանի որ չի կարող պատահել այնպես, որ 15 հոգով մարդուն վայրագ ծեծով հասցնեն սպանության և այն որակեն՝ անզգուշաբար սպանություն։

Այն հարցին, թե ինչու մերժեցիք քննարկում անցկացնելու քննիչի հրավերը, Զարուհին ասաց. «Մենք չգնացինք քննարկման, քանի որ բազմիցս նախաքննական մարմնին ուղարկել էինք նամակներ՝ որպես քաղաքացիական նախաձեռնություն և ոչ մի պատասխան չենք ստացել, և երկրորդ՝ նախաքննական մարմինների հետ աշխատում են փաստաբաները, մենք իրավական հարթության վրա չենք խոսում, մենք ուղղակի հարցը դնում ենք իրավական հարթության վրա»- ամփոփեց ակտիվիստը։