Իշխանափոխությունից մեկ ժամ հետո «Մարտի 1»-ի գործը կարճվելու է. Սողոմոնյան (տեսանյութ)

2-րդ նախագահ Ռոբերտ Քոչարյանը շարունակում է զբաղվել քաղաքականությամբ՝ նույնիսկ լինելով բանտախցում։ Այս մասին ԼՈՒՐԵՐ․com—ի հետ զրույցում ասաց 2-րդ նախագահի գրասենյակի ղեկավար Վիկտոր Սողոմոնյանը։

Խոսելով Ռոբերտ Քոչարյանի ավագ որդու՝ Սեդրակ Քոչարյանի՝ հորը տեսակցելու արգելքի պատճառների մասին, Սողոմոնյանն ասաց, որ դա պայմանավորված է Սեդրակ Քոչարյանի դեմ հարուցված քրգործով․ «Հոգեբանական ճնշման տեսանկյունից կարող ենք երկար քննարկել, թե ինչու չեն թողնում, որ հանդիպի, բայց փաստացի պատճառն այն է, որ քրեական գործ կա, որի պատճառով հանդիպման հնարավորություն չկա»,- նշեց նա։

Անդրադառնալով՝ ի աջակցություն Քոչարյանի իրականացվող ստորագրահավաքի վերաբերյալ կարծիքներին, թե դրանք կեղծ են՝ Սողոմոնյանը նկատեց․ «Կենդանի մարդիկ են, որոնք ստորագրում են։ Տեսախցիկները միացված են և այդ պայմաններում են մարդիկ ստորագրում։ Եթե եկողները կեղծ են համարվում, ապա իրական ժողովուրդը ո՞վ է, որտե՞ղ է»,- ասաց Սողոմոնյանը

«Մարտի 1»-ի գործով դատավարությունը երկարաձգվում է և  կարծիքներ կան, որ մինչև իշխանությունը չփոխվի, «Մարտի 1»-ի գործը չի հանգուցալուծվի՝ հարցին ի պատասխան, Սողոմոնյանն ասաց․ «Զուտ տեխնիկապես, եթե 800-ից ավել վկաների կանչեն հարցաքննության և այս տեմպով նշանակվեն դատերը, ապա  այս դատաքննությունը կարող է տևել տարիներ։ Քանի որ գործը ոչ մի իրավական հիմք չունի, այն պահում են սվիններով։ Իշխանությունն այն պահում է այնքան, քանի դեռ իշխանություն ունի, երբ կորցնի իշխանությունը, այս գործը մեկ ժամ հետո ավարտվելու և կարճվելու է։ Այն մարդիկ, ովքեր զբաղվել են այդ գործի սարքմամբ, պատասխանատվություն են կրելու, սկսած նրանցից, ովքեր գործը կարել են, վերջացրած նրանցից, ովքեր կազմակերպել են քաղաքական հետապնդումը»,- նշեց 2-րդ նախագահի գրասենյակի ղեկավարը։ 

Առավել մանրամասն՝ տեսանյութում

Սոնա Հարությունյան