Ազգային ժողովում մեկնարկել է հերթական նիստը. ՈՒՂԻՂ

ՀՀ Ազգային ժողովում մեկնարկել է հերթական նիստը: Նոյեմբերի 19-ին Ազգային ժողովի պատգամավորները գաղտնի քվեարկությամբ կընտրեն Կոռուպցիայի կանխարգելման հանձնաժողովի անդամներին:

Կոռուպցիայի կանխարգելման հանձնաժողովի անդամների ընտրության համար մեկական թեկնածուներ են առաջարկել ՀՀ կառավարությունը, Ազգային ժողովի «Իմ քայլը», «Բարգավաճ Հայաստան», «Լուսավոր Հայաստան» խմբակցությունները» և Բարձրագույն դատական խորհուրդը: ՀՀ կառավարության կողմից, որպես թեկնածու առաջադրվել է Լիլիթ Ալեքսանյանը, ՀՀ Ազգային ժողովի «Իմ քայլը» խմբակցությունն առաջադրել է Էդգար Շաթիրյանի թեկնածությունը, «Բարգավաճ Հայաստան» խմբակցությունը՝ Նարեկ Համբարձումյանի, «Լուսավոր Հայաստան» խմբակցությունը՝ Հայկուհի Հարությունյանի, իսկ ՀՀ Բարձրագույն դատական խորհուրդն առաջադրել է Արամայիս Փաշինյանի թեկնածությունը:

Նոյեմբերի 12-ից գումարված նիստի ընթացքում պատգամավորները մի շարք օրենքների նախագծեր են քննարկել և ընդունել առաջին ու երկրորդ ընթերցմամբ:

Նոյեմբերի 13-ին ՀՀ կառավարության հետ հարցուպատասխանի ընթացքում գործադիրի անդամները պատասխանել են պատգամավորների հարցերին:

Նոյեմբերի 14-ին Հայաստանի Հանրապետության 2020 թվականի պետական բյուջեի մասին օրենքի նախագծի հիմնական և հարակից զեկուցողները պատասխանել են պատգամավորների հարցերին:

Նոյեմբերի 15-ին ՀՀ Ազգային ժողովում Հայաստանի Հանրապետության 2020 թվականի պետական բյուջեի քննարկման ընթացքում ՀՀ վարչապետ Նիկոլ Փաշինյանը հայտարարել է, որ բյուջեի այս նախագիծը հեղափոխական է: «Բարգավաճ Հայաստան» խմբակցությունը բյուջեն հեղափոխական չհամարելով նշել է, որ դեմ է քվեարկելու Հայաստանի Հանրապետության 2020 թվականի պետական բյուջեի նախագծին: ԱԺ նախագահ Արարատ Միրզոյանը հայտարարել է բյուջեի նախագծի քննարկման ընդմիջում՝ առնվազն 4 օրով և նշել, որ պատգամավորներն ու խմբակցություններն իրենց առաջարկները կարող են ներկայացնել 24 ժամվա ընթացքում:

Նոյեմբերի 18-ին պատգամավորները լսել են Կոռուպցիայի կանխարգելման հանձնաժողովի անդամի թեկնածուներին և հարցեր ուղղել նրանց: