Սեւանա լճում բաց թողնվեց Սեւանի իշխանի Ամառային եւ Գեղարքունի ենթատեսակների 60 հազար մանրաձուկ

Կարճաղբյուր եւ Մաքենիս գետերից Սեւանա լիճ  բաց թողնվեց Սեւանի իշխանի Ամառային   եւ Գեղարքունի ենթատեսակների շուրջ 60 հազար մանրաձուկ: Բացթողնման աշխատանքները վերահսկում էր ՀՀ շրջակա միջավայրի նախարարության կողմից ստեղծված աշխատանքային խումբը: Միջոցառմանը  մասնակցում  էր նաեւ Գեղարքունիքի մարզպետարանի գյուղատնտեսության եւ բնապահպանության վարչության պետ Համբարձում Համբարձումյանը: Մանրաձկան բացթողումն իրականացվել է  «Սեւանի իշխանի պաշարների վերականգնման եւ ձկնաբուծության զարգացման հիմնադրամի» ծրագրով,   Սեւանի իշխանի մանրաձկան գործարանում աճեցված  պաշարների հաշվին: Ինչպես հավաստեց Սեւանի  իշխանի մանրաձկան գործարանի տնօրեն  Տիգրան Վարդանյանը, Սեւանա լիճ է բաց թողնվել Սեւանի իշխանի Ամառային ենթատեսակի 24-25 գրամ միջին քաշով 10 հազար,  Գեղարքունի ենթատեսակի 40-50 գրամ միջին քաշով 10 հազար եւ 3-5 գրամ միջին քաշով 40 հազար հատ մանրաձուկ:   

«Տեղափոխելուց ընդհանրապես անկում չգրանցվեց: Բավականին առողջ, կենսունակ մանրաձուկ էր: Հույս հայտնենք, որ Սեւանի էնդեմիկ ձկնային պաշարները կհամալրվեն: Մնում է, որ կարողանանք կազմակերպել պահպանությունը լճում, եւ 2-3 տարի հետո կունենանք հետվերադարձ: Ձուկը գետով բարձրանում է, եւ բնական վերարտադրություն է տեղի ունենում: Արդյունքներն ավելի տեսանելի կլինեն, եթե հաջողվի Սեւանա լճում կանոնակարգել արդյունագործական ձկնորսությունը»,-հավաստեց Գեղարքունիքի մարզպետարանի գյուղատնտեսության եւ բնապահպանության վարչության պետ Համբարձում Համբարձումյանը:

«Եղել է ընդհանուր ժողով, որի ժամանակ որոշվել են բացթողնման քանակը, չափսերը եւ վայրը: Մինչեւ 2015 թվականը Սեւանա լիճ բաց թողնվող իշխանի մանրաձուկը գնվում էր հիմնականում Արարատյան դաշտավայրի ձկնաբուծական տնեսություններից` պետական բյուջեի միջոցներով: Արդեն 4 տարի մանրաձուկն ամբողջությամբ իր միջոցների հաշվին բաց է թողնում «Սեւանի իշխանի պաշարների վերականգնման եւ ձկնաբուծության զարգացման հիմնադրամը»: Մեր արտադրածը շատ ավելի կենսունակ մանրաձուկ է, քանի որ այն արտադրվում է տեղում , եւ՛ ջերմաստիճանային տարբերություններ չկան, եւ՛ կենսաբանական ծագմամբ  այն մաքուր է, խառնածին չէ: Եկող տարվա համար եւս մեր հիմնադրամը սահմանելու է իշխանի մանրաձկան ենթատեսակների արտադրության եւ Սեւանա լիճ բաց թողնելու չափաքանակները: Բնական վերարտադրության միջոցով լճի էնդեմիկ ձկնատեսակների պաշարների համալրումը եւս կարեւորում ենք, սակայն դրան խանգարում են  չթույլատրվող որսագործիքներով ապօրինի ձկնորսությունը եւ ձկների համար ձվադրավայր հանդիսացող գետերի աղտոտվածությունը»,-նշեց Տիգրան Վարդանյանը:

 «Սևանի իշխան»  ՓԲԸ-ին պատկանող մանրաձկան գործարանում լճի էնդեմիկ եւ վերացող ձկնատեսակների պահպանման նպատակով սեփական նախաձեռնությամբ հավաքագրվել է Սեւանի կողակի որոշ խմբաքանակ: 2020 թվականի գարնանը մեկնարկելու են նաեւ այս ձկնատեսակի փորձնական վերարտադրության աշխատանքները: