Պաշտպանը դիմել է ՀՀ վարչապետին

Երևան քաղաքի Սիսակյան փողոցի թիվ 3 հանրակացարանի թվով 124 բնակիչներ Մարդու իրավունքների պաշտպանին հասցեագրված դիմումով հայտնել են, որ «Հայսեյսմշին և ԿՊ ԳՀԻ» ԲԲԸ-ի կողմից կատարվել են Սիսակյան փողոցի թիվ 3 բազմաբնակարան հանրակացարանային շենքի տեխնիկական վիճակի հետազոտման աշխատանքներ, որի արդյունքում ընկերության կողմից դեռևս 2007 թվականի օգոստոսի 31-ին տրված եզրակացության համաձայն` շենքի սեյսմիկ խոցելիության աստիճանը գնահատվել է բարձր, իսկ վթարայնությունը դասվել է 4-րդ աստիճանի, արդյունքում շենքն ընդգրկվել է քանդման ենթակա շենքերի առաջնահերթության խմբում:

Պաշտպանի կողմից իրականացված համապատասխան հարցումների արդյունքում պարզվել է, որ Երևանի քաղաքապետարանը, հաշվի առնելով անկանխատեսելի հետևանքները, 2011 թվականին Ֆինանսների և Քաղաքաշինության նախարարություններին առաջարկել էր իր պատրաստակամությունը` շենքերի քանդման և բնակիչների վերաբնակեցման խնդիրների լուծման նպատակով Երևան համայնքի և պետական բյուջեի միջոցներով համաֆինանսավորման սկզբունքով կարգավորել հարցը: Իսկ Քաղաքաշինության նախարարը նշել է, որ սկսած 2009 թվականից ՀՀ տարեկան պետական բյուջեների և միջնաժամկետ ծախսային ծրագրերի հայտերում ներկայացվել է տվյալ խնդրի ֆինանսավորման հարցը, ինչը սակայն մերժվել է:

Ելնելով դիմումատուների շահերից, նկատի ունենալով վերոնշյալ հարցի հրատապ լուծման անհրաժեշտությունը, քաղաքացիների կյանքին և առողջությանը սպառնացող վտանգը` Պաշտպանը դիմել է ՀՀ վարչապետին' խնդրելով հնարավորինս սեղմ ժամկետում հանձնարարել ուսումնասիրել վերոնշյալ հարցի լուծման հնարավոր տարբերակները' հաշվի առնելով Երևանի քաղաքապետարանի կողմից առաջարկվող համաֆինանսավորումը: