Տեղ գյուղի թիվ 2 դպրոցը նոր գույք ունեցավ՝ շնորհիվ ամերիկահայ բարերարի ու ընկերոջ

Հայաստանից դուրս, սակայն Հայաստանի ու հայի հոգսով ապրող մեր հայրենակիցները շարունակում են օգնությունը՝ հայրենի երկրին ու համերկրացիներին։ Նրանցից մեկն էլ արդեն 30 տարի ԱՄՆ-ում ապրող, գործարար Հովհաննես Չամիչյանն է, ով տարիներ շարունակ բարեգործական ծրագրերով է հանդես եկել և օգնություն ցույց տվել Հայաստանում ապրող հայերին։

Հովհաննեսի ձեռագիրն է՝ համացանցում հանդիպած անօգնական վիճակում գտնվող հայրենակիցների հետ կապ հաստատել և վերցնել ամենօրյա հոգածության ներքո։ 

Այս օրերին էլ, շնորհիվ Հովհաննեսի և նրա ընկեր Ստեփան Մկրտչյանի, Տեղ գյուղի թիվ 2 միջնակարգ դպրոցը նոր գույք ունեցավ: 15.000 դոլար արժողությամբ 154 աշակերտական սեղան-նստարանն արդեն դպրոցում է։ 

Սա տղաների բարեգործական միջոցառումների միակ դեպքը չէ։ Նրանք իրենց ընկերների հետ միասին ձեռնամուխ են եղել բազմաթիվ բարեգործական նախագծերի․ կազմակերպված տարբեր ակցիաներից, նախաձեռնություններից հանգանակված գումարներն ուղղում են կարիքավոր մարդկանց:

Ամիսներ առաջ էլ, համացանցում տեսնելով ՀՀ վարչապետ Նիկոլ Փաշինյանի՝ Գորիս այցի ժամանակ 2 փոքրիկ աղջնակների լացակումած աչքերը, որոնց հայրը, ինչպես հայտարարվեց, սպանվել էր, Հովհաննես Չամիչյանը որոշել էր գալ և մկրտել երեխաներին։ Ի վերջո, նա և ընկերը դարձել էին քույրերի կնքահայրերը։ 

Բարերար Հովհաննես Չամիչյանը վերջին 5 տարվա ընթացքում բազմաթիվ բարեգործություններ է արել Հայաստանի համար։ Սակայն դրանց մասին բարեգործն ինքը երբեք չի ցանկացել բարձրաձայնել։ Բայց, հարկավոր է նաև դրանց մասին տեղեկացնել հանրությանը, որպեսզի օգնություն ցուցաբերած անձինք վստահ լինեն, որ իրենց տրամադրված միջոցները տեղին են օգտագործվում։

«Ես չեմ սիրում խոսել դրանց մասին, բայց ուզում եմ նաև, որ իմ ընկերներն ու հարազատները, որոնք մեծ լումա ունեն այդ ծրագրերի իրագործման առումով, իմանան և վստահ լինեն, որ իրենց տրամադրած միջոցները ծառայում են իրենց նպատակին և որևէ գումար աննպատակ չի օգտագործվում։ Առաջիկայում մի քանի նախագիծ ենք ուզում իրականացնել՝ դպրոցի դասասենյակների վերանորոգում, դոմիկներում և անբարենպաստ պայմաններում ապրող ընտանիքների համար տնակների կառուցում և այլն»,- մեզ հետ զրույցում ասաց Հովհաննես Չամիչյանը։ 

Բարերարը հույս ունի, որ կարող են օրինակ դառնալ մյուսների  համար, որոնց շնորհիվ կարող է ընդլայնվել կարիքավորներին օգնելու հնարավորությունը։