Ադոնցը ԵՄ-ի հետ գործընկերության ընդլայնումը համարում է ՀՀ արտաքին քաղաքական գերակայություններից

ՀՀ արտաքին գործերի փոխնախարար Ավետ Ադոնցը Եվրոպական միության և դրա անդամ երկրների հետ գործընկերության ընդլայնումը համարում է Հայաստանի Հանրապետության արտաքին քաղաքական գերակայություններից մեկը: Այս մասին Ադոնցը նշեց նոյեմբերի 26-ին Հայաստանի Հանրապետության և Եվրոպական միության միջև կնքված Համապարփակ և ընդլայնված գործընկերության համաձայնագրի 2-րդ տարեդարձի կապակցությամբ կայացած մամուլի ասուլիսի ընթացքում:

«Երկու տարի և երկու օր առաջ ստորագրվեց Հայաստանի Հանրապետության և Եվրոպական միության միջև կնքված Համապարփակ և ընդլայնված գործընկերության համաձայնագիրը, և ուզում եմ բոլորիս շնորհավորել այս երեխայի ծննդյան օրվա կապակցությամբ: ՀԸԳՀ-ն դարձել է Հայաստանի Հանրապետության և Եվրոպական միության հարաբերությունների Սահմանադրությունը, ներառելով ՀՀ-ԵՄ գործընկերության համընդգրկուն օրակարգը: ՀԸԳՀ-ն բարեփոխումների յուրօրինակ գործիք է, որի արդյունավետ կիրառումը շոշափելի արդյունքներ կբերի մեր հասարակության և քաղաքացիների համար: ԵՄ-ի ու նրա անդամների հետ գործընկերության ընդլայնումը Հայաստանի Հանրապետության արտաքին քաղաքական գերակայություններից է: Այս համատեքստում առանցքային նշանակություն ունի ՀԸԳՀ արդյունավետ կիրարկումը, որի ապահովման հանձնառությունը բազմիցս վերահաստատվել է ՀՀ կառավարության կողմից»,- ասաց Ադոնցը:

Փոխնախարարը նշեց, որ 2018թ. ապրիլի 11-ին ՀՀ Ազգային ժողովի կողմից ՀԸԳՀ-ի միաձայն վավերացումը հնարավորություն ընձեռեց 2018թ. հունիսի 1-ից մեկնարկել համաձայնագրի ժամանակավոր կիրարկումը:

«Մեկ ամիս անց սկսվեց մշակվել համաձայնագրի կիրարկման ճանապարհային քարտեզը: 2019թ. հունիսի 1-ին՝ ժամանակավոր կիրարկման մեկնարկից ճիշտ մեկ տարի անց համաձայնագրի կիրարկման ճանապարհային քարտեզը հաստատվեց ՀՀ վարչապետի համապատասխան որոշմամբ, և ողջունվեց Բրյուսելում կայացած ՀՀ-ԵՄ գործընկերության խորհրդի երկրորդ նիստում»,- նշեց նա:

Հայաստանի Հանրապետության և Եվրոպական միության միջև Համապարփակ և ընդլայնված գործընկերության համաձայնագիրը ստորագրվել է 2017թ. նոյեմբերի 24-ին Բրյուսելում: Այն վավերացրել և ԵՄ խորհրդին տեղեկացրել են Բուլղարիան, Չեխիան, Դանիան, Գերմանիան, Էստոնիան, Կիպրոսը, Լատվիան, Լիտվան, Լյուքսեմբուրգը, Հունգարիան, Մալթան, Լեհաստանը, Ռումինիան, Սլովակիան, Ֆինլանդիան, Միացյալ Թագավորությունը, Սլովենիան: