Համաշխարհային պատերազմները հայտարարությամբ չեն սկսվում. կարծիք

Լրագրողների հետ հանդիպմանն իրանագետներ Ահարոն Վարդանյանն ու Գագիկ Միսակյանը անդրադարձան Իրան-ԱՄՆ հարաբերություններին, գեներալ Սոլեյմանիի սպանությանը ու հայկական կողմի պաշտոնական դիրքորոշմանը:

«Գեներալ Սոլեյմանին մեծ հեղինակություն ուներ և հսկայական գործառույթներ են իրականացրել: Իհարկե, շատ դժվար է ասել, թե ինչ կլինի հետագայում: Հիմա արդեն ռմբակոծությունները տեղափոխվել են երրորդ երկիր, օրինակ՝ Իրաք: Լինում են, այսպես ասած, հիբրիդային հարձակումներ»,- լրագրողների հետ հանդիպմանն ասաց Վարդանյանը:  

Գարիկ Միսակյանն էլ հիշեցրեց, որ օրեր առաջ պաշտոնապես ասվել է, որ, եթե Իրանի հողի վրա հարձակում լինի այլ երկրից, ապա պատասխան է տալու ինչպես ԱՄՆ-ը, այնպես էլ այն երկիրը, որի տարածքից եղել է ռմբակոծությունը:  

Բանախոսները նաև նշեցին, որ Հայաստանի պաշտոնական դիրքորոշումը ճիշտ էր, քանի որ այնքան էլ խոհեմ չէ նման իրավիճակում կողմերից որևէ մեկի շահերը պաշտպանել:

«Իրանը մեր հարևանն է: Եվ այդ տեսակետից մեզ էլ է վտանգ սպառնում: Մենք պետք է չափազանց զգույշ լինենք»,- ասաց Վարդանյանը՝ հավելելով, որ Հայաստանից հնչած խոսքերը գոհացրել են Իրանին պետական քաղաքացիական  մակարդակով:

Բանախոսները նաև հիշեցրեցին, որ Ադրբեջանը ԱՄՆ-ին  առաջարկել է իր տարածքը օգտագործել Իրանի վրա հարձակումների համար:

Ահարոնյանն ասաց, որ զարգացումները հաշվի առնելով՝ ապագան կանխատեսել շատ դժվար է. «Ամեն ինչ էլ հնարավոր է: Իրականում, երբ համաշխարհային պատերազմ է սկսվում, ոչ ոք չի հայտարարում այդ մասին: Թեպետ չեմ կարծում, որ սա հանգեցնի համաշխարհային պատերազմի: Գուցե ռազմական գործողություների տարածքը ընդլայնվի՝ մասնավորապես Մերձավոր Արևելքում»:

Իրանագետները հույս հայտնեցին, որ ռազմական գործողությունները շուտով կավարտվեն և հետագա գործողությունները կշարունակվեն բանակցային սեղանի շուրջ: