«Կախարդական փայտիկո՞վ պետք է իրավիճակը փոխվեր». Հայաստանում մշտական բնակչության թիվը նվազել է

2019-ի հունվարի 1-ի դրությամբ Հայաստանի Հանրապետության մշտական բնակչության թիվը կազմել է 2 965 300 հոգի, հաղորդում է ՀՀ վիճակագրական կոմիտեն։ Նույն տվյալների համաձայն՝ 2018 -ին եղել է 2 972 700 մլն մարդ, այսինքն՝ մեկ տարվա ընթացքում բնակչությունը նվազել է 7400 հոգով: Ի դեպ, սա 1990-ից ի վեր Հայաստանում գրանցված մշտական բնակչության ամենանվազ ցուցանիշն է:

Չնայած նրան, որ 2018-2019 թվականներին արտագաղթի ծավալները, ըստ որոշ դիտարկումների, նվազել են, սակայն ծնելիության շարունակական անկումն ու մահացությունների աճը պայմանավորում են Հայաստանի մշտական բնակչության քանակի նվազումը: Պարզելու համար, թե ինչու է նվազել ՀՀ բնակչությունը՝ ԼՈՒՐԵՐ.com-ի թղթակիցը զրուցեց ժողովրդագետ Ռուբեն Եգանյանի հետ: 

«Բնակչության թվի նվազման պատճառները միշտ նույն են լինում: Ինչպես նախկինում՝ հիմա էլ պատճառը ծնելիության նվազումն ու արտագաղթն է: Ի՞նչ պետք է լինի, որ այդ միտումը փոխվի: Միայն տնտեսական վիճակի բարելավումն է, որ կարող է նպաստել արտագաղթի նվազմանը», -նշեց նա

Եգանյանը ցավով ընդգծեց, որ հիմա էլ  չունենք բավարար քանակի աշխատատեղեր, չունենք կայուն տնտեսական վիճակ, ինչի պատճառով  էլ բնակչությունն արտագաղթում է:

«Որևէ բան չի փոխվել: Ի՞նչ է, որ իշխանափոխություն է տեղի ունեցել, դրանից հետո կախարդական փայտիկով պետք է իրավիճակը փոխվեր»,-ամփոփելով խոսքն՝ ասաց նա:

Լուսինե Մարդոյան