Մեզ համար ցայտնոտային ժամանակներն ավարտվել են․ Նիկոլ Փաշինյան (տեսանյութ)

Վարչապետ Նիկոլ Փաշինյանը 2019 թվականը հաջողված տարի է համարում։ Կառավարության նիստի սկզբում վարչապետը նշեց, որ 2018-19 թվականներին հաջողվեց լուծել օրակարգի կարճաժամկետ բոլոր խնդիրները, և 2020 թվականը պետք է արդեն ռազմավարական խնդիրների լուծմամբ զբաղվելու ժամանակաշրջան լինի։

«Ես կարծում եմ՝ 2020 թվականը բավական լավ ենք սկսել, և այն նորացված հայեցակարգը, որը մենք առաջարկեցինք ՀՀ քաղաքացիներին և ոչ միայն ՀՀ քաղաքացիներին, ըստ էության արդարացրեց իրեն։ Եվ ամանորյա օրերին, ընդհուպ հիմա զբոսաշրջիկները տեսանելի են Երևանի փողոցներում ու Հայաստանի Հանրապետությունում։ Թվերն ամփոփված չեն, բայց առնվազն վիզուալ պատկերն այդպիսին է։ Եվ պետք է արձանագրել, որ դրանում ամենևին ոչ երկրորդական նշանակություն ունեցան այն որոշումները, որ մենք կայացրեցինք Հանրապետության հրապարակում՝ ամանորյա տոնակատարությունների հետ կապված։ Եվ ես կարծում եմ, որ նաև 2018-19 թվականի փորձը հաշվի առնելով և այն, որ մեզ համար, ըստ էության, ցայտնոտային ժամանակներն ավարտվել են, մյուս տարվա ամանորյա միջոցառումների պլանավորումը պետք է հենց այսօրվանից սկսել»,- ասաց Նիկոլ Փաշինյանը։

Կառավարության ղեկավարի խոսքով՝ այս կարգի ներդրումներն իրենց տնտեսապես արդարացնելու են։ Ըստ Նիկոլ Փաշինյանի՝ նախատեսվում է, որ 2020 թվականը զբոսաշրջային առումով ավելի լավ տարի է լինելու։ «Եվ դրա համար կան ազդակներ։ Շուտով կսկսվեն բյուջետային ավիաընկերությունների չվերթները ՀՀ-ում, հաջորդ շաբաթ արդեն բյուջետային ավիաընկերությունն առաջին չվերթը կիրականացնի։ Եվ այդ պրոցեսը շարունակական է։ Այս ամեն ինչը շատ լավ է, բայց ես ուզում եմ ընդգծել, որ այստեղ անելիքներ ունենք, մասնավորապես, մեր երկրում սպասարկման մակարդակը բարձրացնելու ուղղությամբ»,- ասաց վարչապետը։

Վարչապետ Նիկոլ Փաշինյանի կանխատեսմամբ՝ 2020 թվականը զբոսաշրջային առումով լինելու է ավելի լավ տարի, դրա համար կան հստակ ազդակներ:

«Շուտով կսկսվեն  բյուջետային ավիաընկերությունների չվերթները Հայաստան: Հաջորդ շաբաթ արդեն «RyanAir»-ն իր առաջին չվերթը կիրականացնի, այդ պրոցեսը շարունակական է: Միջազգային ամենահեղինակավոր լրատվամիջոցներում հայտնվում են տեղեկատվություններ, որոնք իրենց լսարանին խորհուրդ են տալիս որպես հիմնական զբոսաշրջային ուղղություն ընտրել Հայաստանը: Այս ամենը շատ լավ է, բայց ես ուզում եմ ընդգծել, որ մենք այս ոլորտում շատ անելիքներ ունենք, մասնավորապես, ՀՀ-ում սպասարկման մակարդակը բարձրացնելու, որակի հարցը լուծելու առումով: Պետք է մտածենք, թե ինչպես սկսած տաքսու վարորդներից, ավարտած մնացած օղակներով, որոնց հետ զբոսաշրջիկներն առնչվում են, շփման որոշակի կուլտուրա սերմանենք»,- ասաց վարչապետ Փաշինյանը:

Նիկոլ Փաշինյանը հավելեց, որ արդեն թռիչքների երկու ուղղություն իրականացվելու է Գյումրի, և այնտեղ համենայնդեպս, օդանավակայանից այլ տարածքներ զբոսաշրջիկներին տեղափոխման քաղաքակրթական բովանդակության մասին պետք է շատ լուրջ մտածել: «Ընդհանրապես, դեռ օդանավակայաններում կարելի է հանդիպել տեսարանների, որտեղ անցագրային տարածքից դուրս եկող մարդիկ ենթարկվում են խմբակային հարձակումների տարբեր ծառայություններ առաջարկողների կողմից: Այստեղ 1000 դրամ ավել-պակաս տանելու խնդիր չէ: ՀՀ ժամանող զբոսաշրջիկների համար պետք է պատրաստվեն տեղեկատվական թերթիկներ՝ տաքսիների մոտավոր գների մասին, ամեն ինչի մոտավոր գների մասին, ընդհուպ առավել քաղաքակիրթ տաքսի ծառայություններից օգտվելու տարբերակների ու հնարավորությունների մասին: Ըստ էության, վերջին 30 տարվա ընթացքում ՀՀ ժամանող զբոսաշրջիկների օրակարգը չի փոխվել»,- ասաց վարչապետը: