Աշխատողներ են գրանցել, ովքեր աշխատանքի չեն գնացել. գործը դատարանում է

Երևանի Շենգավիթ վարչական շրջանում գործող «Պատանեկության ստեղծագործական կենտրոն»-ում խախտումներ են հայտնաբերվել։ Տեղեկությունը ԼՈՒՐԵՐ.com-ի հետ զրույցում հաստատեց ՀՀ գլխավոր դատախազության հասարակայնության հետ կապերի պատասխանատու Արևիկ Խաչատրյանը՝ նշելով, որ գործը դատարանում է:

 

Հարցին, թե ի՞նչ խախտումներ են հայտնաբերվել, դատախազությունից փոխանցեցին, որ կենտրոնում աշխատողներ են գրանցել, ովքեր աշխատանքի չեն գնացել:

 

«Աշխատակիցները դիմում են գրել, ուղարկվել է Ոստիկանություն՝ նյութ նախապատրաստելու, այնուհետև հարուցվել է քրեական գործ՝ 179-ի 2-րդ մասի 1-ին և 3-րդ կետերով։ Նախաքննությունը իրականացրել է ՔԿ-ն։ Որպես մեղադրյալ ներգրավվել է 3 անձ»,- նշեց Խաչատրյանը:

 

Նշենք, որ «Պատանեկության ստեղծագործական կենտրոն»-ի տնօրենն իրավապաշտպան Նարե Արամյանն է, ով հայտնի է հեռուստատեսային տարբեր հաղորդումներից, ինչպես նաև հանդես է գալիս կենդանիների պաշտպանությամբ:

 

Արամյանի տնօրինած կենտրոնը զբաղվում է երեխաների արտադպրոցական կրթությամբ: Կենտրոնում գործում են մշակութային տարբեր խմբակներ, որոնք զբաղվում են երեխաների զարգացման տարբեր ուղղություններով: