Այն իրոք էլիտար զորամաս է. ՀՀ ԶՈւ ԳՇ պետը՝ աղմկահարույց զորամասի մասին

Այսօր՝ փետրվարի 7-ին, ՀՀ ԶՈւ ԳՇ պետ Արտակ Դավթյանը Ազգային ժողովում մասնակցել է ապրիլյան պատերազմի հարցերով ստեղծված քննիչ հանձնաժողովի փակ նիստին:

Նիստից հետո լրագրողների հետ զրույցում Դավթյանը հայտարարեց, որ այսօրվա աշխատանքը շատ լավ մթնոլորտում է անցել. «Բոլոր հարցերը քննարկվեցին: Աշխատանքային հիանալի պայմաններ են ստեղծված: Ամեն ինչ կազմակերպված էր, դիտողություն չկա: Իսկ ընդհանուր առմամբ մենք՝ բոլորս, պետք է աջակցենք հանձնաժողովի աշխատանքները, որպեսզի այն իր տրամաբանական ավարտին հասցվի»:

Դավթյանը, պատասխանելով լրագրողների հարցերին, խոսեց նաև վերջին շրջանում ոչ մարտական պայմաններում զոհերի մասին: Հարցին՝ չի մտահոգում իրեն արդյո՞ք զոհերի նման թիվը, Դավթյանը  նշեց, որ բարձրաձայնող իրավապաշտպանները, եթե ծառայեին, նման կերպ չէին արտահայտվի. «Նրանք թող աջակցեն մեզ»:

Դավթյանի խոսքերով, քաղաքացիական կյանքում էլ ամեն օր մարդ է մահանում. «Ցանկացած հզոր բանակ վերցրեք ու համեմատեք թվերը: Իհարկե դա արդարացում չէ, կան բացթողումներ: Մենք խնդիրներն ավելի լավ ենք տեսնում ու անում ենք ամեն ինչ լուծելու համար: Մենք ուզում ենք, որ որևէ զոհ չլինի, գնում ենք դրան: Եթե կարող եք օգնել, եկեք օգնեք, միասին հասնենք դրան»:

ՀՀ ԶՈւ ԳՇ պետը խոսեց նաև, այսպես կոչված, էլիտար զորամասի մասին, որտեղ ծառայում են պաշտոնյաների զավակներ. «Իսկ որտե՞ղ պետք է ծառայեն նրանք: Որ զորամասում էլ ծառայեն, այդ մասին հարց կտայիք: Զորամասը, որի մասին խոսվում է, իհարկե էլիտար զորամաս է, քանի որ էլիտար խնդիրներ է կատարում՝ իր կրակային հզորությամբ և կրակային աջակցությամբ: Այն նաև մարտական հերթապահություն է իրականացնում: Լավ, բա որտե՞ղ տանենք…Արցախում ծառայում են, ասում եք՝ Արցախում են, Հայաստանում են ծառայում, ասում եք՝ Հայաստանում են»:

«Զորամասում 1000 զինծառայող է ծառայում, կա 2-3 պաշտոնյայի որդի: Ցանկացած նման զորամասում կգտնեք 2-3 հոգու, ովքեր այս կամ այն կերպ փոխկապակացված են ինչ-որ մեկի հետ: Նույնը նաև Հայաստանում է»,-ասաց նա: