Financial Times. Սիրական պատերազմը կարող է վատ ավարտվել Թուրքիայի համար

Սիրիայի փլուզումը ցուցադրում է այն խորը ճաքերը, որոնց վրա հիմնվում է Թուրքիայի ազդեցությունը տարածաշրջանում։ Հետևանքները կարող են շատ տխուր լինել ոչ միայն Թուրքիայի, այլև Արևմուտքի համար, որին անհրաժեշտ է կայուն դաշնակից իսլամական աշխարհում, գրում է ֆինանսական Financial Times-ը։

Քրդերը դանդաղ, սակայն հստակ քայլերով հսկողություն են սահմանել հյուսիսարևելյան Սիրիայի վրա, և Անկարան սկսում է գիտակցել, որ իր ամենավատ մղձավանջը՝ գոյություն ունեցող պետական սահմանները չճանաչող քրդական ֆեդերացիան, դառնում է իրականություն: Թուրքական վերնախավի համար դա սպառնալիք է պետության գոյության համար։ Թուրքիայում ապրում է 13 մլն քուրդ։ Քրդական պետության սաղմի առաջացումը Իրաքի քրդական ինքնավարության տարածքում և սիրիական «ազատագրված» շրջաններում կարող է հանգեցնել Թուրքիայի տարածքի խոշոր կտորների անջատման։

Անկարան, մասնավորապես, մտահոգված է Սիրիայում Դեմոկրատական միասնություն կուսակցության (PYD)՝ Քրդական բանվորական կուսակցության (PKK) հավատարիմ դաշնակցի ուժեղացմամբ, որը վերջին 30 տարվա ընթացքում պատերազմում է Թուրքիայի դեմ։ PKK-ն լիարժեք օգտագործմում է Սիրիայում քաղաքացիական պատերազմից բխող հնարավորությունները։ Վերջին շաբաթների ընթացքում կազմակերպվել են մի շարք խոշոր հարձակումներ հարավարևելյան Թուրքիայում, որոնց արդյունքում սպանվել են տասնյակ թուրք զինվորներ։

Միևնույն ժամանակ Թուրքիան ի վիճակի չէ ազդել իրավիճակի վրա. վարչապետ Ռեջեփ Թայիփ Էրդողանի՝ Իրաքյան Քրդստանի առաջնորդ Մասուդ Բարզանիի հետ «ընկերանալու» փորձերը ապարդյուն էին: Բարզանիի պատասխանը Էրդողանի սիրախաղին եղավ Ասադի ռեժիմի դեմ պայքարող Սիրիայի քրդերի կոալիցիայի կազմակերպումը։ Այս կոալիցիայի շարժիչ ուժը PYD-ն է։