Ռուբեն Հայրապետյանը տեղյակ է եղել «Հարսնաքարի» միջադեպից. կասկածները խորանում են

Lurer.com-ի զրուցակիցն է Վահե Ավետյանի իրավահաջորդի (հոր) փաստաբան Տիգրան Եգորյանը։

-Որո՞նք են եղել նախաքննական մարմնի կողմից թույլ տված ամենամեծ ու հիմնական բացթողումները։

-Լուրջ կասկածներ են ստեղծում, այսպես կոչված, անվտանգության աշխատակիցների հետ կապված փաստաթղթերը, աշխատանքային պայմանագրերը։ Ըստ էության դրանք կեղծ են։ Փաստաթղթերում կան կասկածներ ստորագրությունների անհամապատասխանության հետ կապված։

Փաստաթղթային հարցերի ենթակետերից նշեմ, որ նույն պայմանագրերը կնքված են ապրիլ, մայիս, հունիս ամիսներին։ Ստացվում է, որ մինչև այդ «Հարսնաքար»–ը անվտանգության աշխատակիցներ չի ունեցել։ Պետք է խորանալ։ Բողոքարկելու ենք ու պահանջելու՝ պարզել այս հարցերը. ձեռագրաբանական և այլ փորձաքննություններ պետք է անցկացնենք։

Մյուս հարցն այն է, որ այս հինգը (բացառությամբ մատուցողի), այդ օրը Ռուբեն Հայրապետյանին ուղեկցել են Սևան։ Այնուհետև այնտեղից հետ են եկել ժամը 19։00-ի սահմաններում և դրանից հետո գնացել Ֆուտբոլի ակադեմիա։ Եթե նրանք Հայրապետյանի անձնական թիկնազորը չեն, և «Հարսնաքար»–ի աշխատակիցներ են, ապա ինչո՞ւ անմիջապես Երևան վերադառնալուց հետո չեն մեկնել իրենց աշխատավայր։ Եթե ժամը 19։00-ի սահմաններում եկել են, ուրեմն մոտ երկու–երեք ժամ չեն գտնվել իրենց աշխատավայրում։

–Սա ենթադրում է՞, որ նրանք գտնվել են Ռուբեն Հայապետյանի հետ ու Հայրապետյանը հետագա գործողությունների մասին տեղյակ է եղել։

-Այո՛։ Նրանք գտնվել են այնտեղ, հետո 22.25–ի սահմաններում (չնայած ամեն մեկը տարբեր ժամեր է նշում) նստել են «Պրադո» մակնիշի ավտոմեքենան: Բայց Ֆուտբոլի ակադեմիայից մինչև դեպքի վայր 100–200 մետր տարածություն է։ Սակայն նրանք նստել են «Պրադո» մակնիշի ավտոմեքենան և գնացել դեպքի վայր։ Սա էլ է կասկածի տեղիք տալիս: Ինչո՞ւ են նստել ավտոմեքենա՝ «Հարսնաքար» հասնելու համար։ Այսինքն, ամենայն հավանականությամբ, նրանք շտապել են։

- Ի՞նչ կասեք տեսաձայնագրությունների բացակայության մասին:

–Տեսաձայնագրությունները չկան։ Այնտեղ կան պահակներ, ովքեր ցուցմունք են տվել, որ կան տեսախցիկներ, սակայն քննչական գործունեության արդյունքում պարզվել է, որ տեսախցիկների լարերը ավարտվում են մի համակարգչի մոտ, որտեղ բացակայում է այն համակարգը, որը պետք է ձայնագրի այդ տեսանյութը։ Քննիչը բաց է թողել այդ լարերի հետադարձ ուսումնասիրությունը, որպեսզի հասկանալի դառնա, թե որտեղ կա տեղադրված տեսախցիկ։

Այսինքն՝ նրանք լարերի միայն մի մասն են ուսումնասիրել։ Այդ կոշտ կրիչը առգրավելուց հետո ուսումնասիրվել է քննիչի կողմից, որին, որպես ընթերականեր, մասնակցել են երկու անձ, որոնց ինքնությունը ու ընդհանրապես գոյությունը խիստ կասկածելի է։ Բացի ծննդյան տարեթվից, այլ տվյալ չկա։ Նույնիսկ չկա ամիս, ամսաթիվ և հասցե, ուղղակի նշվում է, որ նրանք Գյումրի քաղաքից են։ Այսինքն՝ սրանք կեղծ ընթերականեր են և սա լուրջ կասկածի տեղիք է տալիս նրանց գոյության փաստի վերաբերյալ։

Բացի այդ, ուսումնասիրելով առաջին հատորի 44-46 էջերը՝ արձանագրությունները, պարզվել է, որ նրանց ստորագրությունները տարբեր են։ Նույն ընթերակայի կողմից դրված ստորագրությունները չեն համընկնում իրար։ Սա ևս շատ լուրջ խնդիր է։

-Փորձ արվո՞ւմ է բացառել Ռուբեն Հայրապետյանի մասնակցությունը այս միջադեպին։

-Ռուբեն Հայրապետյանը իր ցուցմունքում ասում է, որ դեպքի մանրամասները ճշտելու համար զանգել է Նորայր Հայրապետյանին, սակայն դրանից հետո քննիչը որևէ այլ հարց չի ուղղել Հայրապետյանին. օրինակ՝ ճշտեցի՞ք, թե՞ ոչ, կամ՝ ի՞նչ մանրամասներ ճշտեցիք։

Ցուցմունքի ավարտին Հայրապետյանը գրել է, որ մանրամասների մասին տեղյակ չէ։ Այս հարցը ևս, ըստ էության, չի մասնավորեցվում։ Նրանք արձանագրային աշխատանք են կատարել, ինչ հայտարարվել է, գրի են առել, ոչ մի քննչական գործողություն չկա։ Սա արդեն լուրջ կասկած է, որովհետև եթե Ռուբեն Հայրապետյանն ասում է, որ ճշտելու նպատակով զանգահարել է, ապա խիստ կասկածելի է, որ նա ճշտած չլինի, երկրորդ՝ եթե զանգահարած լինի ճշտելու մանրամասները, նշանակում է, որ ինքը դեպքից տեղյակ է։ Այսինքն՝ տեղյակ է ինչ-որ դեպքից, որի մանրամասները ճշտելու համար զանգահարել է։ Հասարակ տրամաբանության հարց է։ Այս դեպքում քննիչը պետք է հարցներ տվյալ դեպքից, որի մանրամասների ճշտելու նպատակով Հայրապետյանը զանգել էր Հայրապետյանին։ Այս գործում դրսևորվել է անտարբերություն և անգործություն, ինչը, եթե կասկածի տակ չդնենք քննիչների տարրական կոմպետենտությունը, ուրեմն նշանակում է, որ մտածված քայլ է, կամ ուղղակի քննիչները քննիչ չեն և իրավունք չունեն քննիչ աշխատելու։

Մենք ամսի երկուսին քննիչների անկոմպետենտության և նրանց կողմից կատարված խախտումների հետ կապված բողոք ենք հայտնել և բացարկ ենք հայտնել Գլխավոր դատախազություն, սակայն մինչ այժմ չենք ստացել որևէ պատասխան։ Ժամկետը հինգօրյա է. ամսի յոթին լրացել է, բայց մինչև հիմա որևէ արձագանք չկա։

Ասեմ նաև, որ մենք փաստաբանների պալատին դիմում ենք հանձնելու (ինչպես գիտեք, փաստաբանների պալատում գեներացնում ենք ընթերակաների բազա, որտեղ բոլոր փաստաբանները հայտնում են իրենց գործերի, իրենց հայտնի դարձած ընթերակաների անունները) և փորձելու ենք գտնել, թե որոնք են հաճախ կրկնվող ընթերականները։

Այդ դիմումի պատճենը ուղարկել ենք համապատասխանաբար բոլոր ատյաններ, որպեսզի նրանք վերացնեն հետևյալ խախտումները. նախ՝ տրամադրեն հատորներում պահվող փաստաթղթերի ցանկերը, որպեզի մենք ստիպված չլինենք սկզբից մինչև վերջ թերթել (օպերատիվ աշխատելու համար, դա Քրեական դատավարության 266–րդ հոդվածով նախատեսված խախտում է, որը քննիչի համար նախատեսում է պարտադիր բնույթ), մյուսը՝ կասկածելի են առգրավված իրեղեն ապացույցները, որովհետև այդպիսիք մեզ չեն հատկացվել, և մենք չունենք որևէ տվյալներ դրանց մասին։ Մեզ պետք է հատկացնեն գունավոր լուսանկարները, որովհետև մենք հնարավորություն չունենք պատճենները ներկայացնել՝ այլ փորձագիտական վերլուծություն ստանալու նպատակով։

-Ներկայացված մեղադրանքներում չի նշվում, թե կոնկրետ ով է սպանել Վահե Ավետյանին:

Մեղադրանքն ակնհայտորեն այնպիսի ձևակերպում ունի, որը ուղղակի չի դիմանում որևէ քննադատության։ Այսինքն՝ պարզ չէ՞, թե կոնկրետ ով է հասցրել այդ հարվածները, հարվածը անհատականացնել հնարավոր չէ։ Եթե հնարավոր չէ անհատականացնել հարվածը, ապա բոլոր կասկածները մեկնաբանվում են ի օգուտ մեղադրյալի: Չէ՞ որ այս գործում պետք է մյուս կողմից էլ նայենք։ Եթե ի օգուտ մեղադրյալի կասկածները փարատվում են, դա նշանակում է, որ մեղադրյալը չի դատապարտվում գոնե անզգուշությամբ սպանելու համար։ Սա հնարավորութուն է ստեղծում ուղղակի պատասխանատվությունից ազատել մեղադրյալներին՝ հենց սպանության մասով, կամ գոնե անզգույշ սպանության մասով։ Շատ անորոշ է մեղադրանքը։ Եվ դա քննչական մարմնի անգործության արդյունք է, որովհետև նրանք, բացի տուժողների և մեղադրյալների հարցաքննությունից, այլ դատավարական գործողության ձեռնամուխ չեն եղել, որպեսզի պարզեն, հասկանան, թե որ խումբը որ մեկին է ծեծել և ինչով են ծեծել։

Փորձագետները իրենց եզրակացության մեջ ասում են, որ հարվածները հասցված են կոշտ առարկայով։ Քննիչն իր հարցաքննությամբ պետք է վեր հաներ, պարզեր, թե մեղադրյալների ձեռքին եղե՞լ է արդյոք որևէ իր, առարկա, որովհետև հնարավոր է, որ ինչ–որ առարկայով են հարվածել։ Եթե պարզում է, որ առարկա չի եղել, միայն այդ ժամանակ կարող են ենթադրել, որ բռունցքով է հարվածը հասցված։

Տարրական հարցաքննություններ չեն անցկացվել։ Հասարակ մասնիկաբանական փորձաքննություն պետք է նշանակվեր, որպեսզի քննչական մարմինը հասկանար և որոշակիացներ, թե ով ում է հարվածել։

-Կա՞ որևէ փաստ կամ հիմնավորում, որով Դուք կարող եք հաստատել, որ բժիշկներին ծեծել են 15 հոգի:

Փաստ այս պահին մենք չենք կարող ներկայացնել։ Կոնկրետ փաստեր մենք չունենք, ունենք տուժողների հայտարարությունը, ունենք հասարակ դատողություն:

Եթե տուժողները մեզ ասում են, որ իրենց խմբերի բաժանված են ծեծի ենթարկել, դա նշանակում է, որ առնվազն մեկի համար երկու հոգի է եղել։ Բացի այդ, որոշ տուժողներ իրենց ցուցմունքներում ասում են, որ թևանցուկ եղած ինչ–որ անձի հետ գնացել են կայանատեղի, որտեղ իրեն հարվածել են ետևից։

Այդ պարագայում որտե՞ղ են եղել մյուսները, մյուս չորսին ինչպե՞ս են ծեծել, որ կարողացել են այդպիսի վնասվածքներ հասցնել։ Այստեղ բազում խնդիրներ կան։

Կան վկաներ, որոնց հեռախոսազանգերի վերծանումներից պարզվել է, որ իրենք ստացել են զանգեր տարբեր թիկնապահներից։ Հեռախոսազանգերը եղել են 22.19–ի և 22.22-ի սահմաններում և տևել են 4-5 վայրկյանից մինչև 20-25 վայրկյան։ Սրանք կարճ զանգեր են եղել, մի մասն ասում է, որ չի հիշում, թե ինչ են խոսել։

Բոլորը նույն դիապազոնում են զանգեր ստացել։ Ըստ էության, նրանք կանչվել են այդ վայր և չեն եղել վկաներ, ինչը փորձում են ցուցմունքներով ցույց տալ։

Նրանք փորձում են խուսանավել և խեղաթյուրում են իրականությունը։

-Որո՞նք են Ձեր առաջիկա քայլերը:

Մենք հիմա գործի նյութերին ենք ծանոթանում, ամսի 18–ին ներկայացնելու ենք միջնորդությունների մյուս մասը և պատասխաններից, քննչական գործողություններից է կախված, թե մենք ինչ գործողություններ ենք կատարելու։

Գայանե Համբարձումյան