«Պարենային շտապօգնություն»` Շիրակի կարիքավոր ընտանիքներին. ինչպես և ում դիմել

Ալյուր, շաքարավազ, բուսայուղ, ձավարեղեն, ձու, մսի ու բանջարեղենի պահածոներ և այլ բազմաթիվ մթերքներ ու տնտեսական պարագաներ են ներառված պարենային այն փաթեթներում, որոնք այսօրվանից կբաժանվեն Գյումրու կարիքավոր ընտանիքներին:

«Սոցիալապես անապահով ընտանիքների համար պետական աջակցության ծրագիր մշակվել է և արդեն իրականացվում է, սակայն հասկանալի է, որ շատ ընտանիքներ, տարբեր պատճառներով, հնարավորություն չեն ունենում ընդգրկվել պետական աջակցության ծրագրում: Մեր նախաձեռնությունը հենց այն մարդկանց համար է, ովքեր կարիք ունեն, սակայն չունեն սոցիալական վիճակի հստակ ձևակերպում»,- ԼՈՒՐԵՐ.com-ի հետ զրույցում պարզաբանում է ծրագրի հանրային կապերի պատասխանատու Գրիշա Հովսեփյանը:

Կարիքավոր ընտանիքների խնդիրներով մտահոգ գյումրեցիների նախաձեռնած «պարենային շտապօգնություն» ծրագիրն իրականացվում է Շիրակի մարզպետարանի ու «Գյումրին առանց տնակների» հիմնադրամի օգնությամբ:

«Գաղափարն առաջացավ այն ժամանակ, երբ շատ քաղաքացիներ մեզ դիմեցին, որ աշխատանք չկա ու զրկվել են իրենց ընտանիքի եկամտի վերջին աղբյուրից, ունեն աջակցության կարիք»,- ասում է նախաձեռնության անդամ Կարեն Պետրոսյանը:

Պարենային փաթեթ ստանալու համար նախաձեռնողներին դիմած ընտանիքների թիվն անցել է 400-ը:

«Քանի որ յուրաքանչյուր ընտանիքի պատմություն մանրամասն ուսումնասիրվում է  հնարավոր կեղծիքներից խուսափելու համար, այդ իսկ պատճառով գործի  է դրվել սոցիալական երաշխավորի ինստիտուտը: Միայն ընտանիքի անդամ ու  բարեկամ չհանդիսացող անձը կարող է դառնալ ընտանիքի երաշխավոր ու հավաստել տրամադրված տեղեկությունների հավաստիությունը»,- նշում է համակարգողը:

Նա նաև նշեց, որ այս պահին արդեն կա 10 ընտանիք, որոնց հասցեներով ուղարկվում են պարենային փաթեթները: Համակարգողի խոսքով՝ շահառու ճանաչված յուրաքանչյուր ընտանիքի տրամադրվելու է սոցիալական աջակցության պարենային զամբյուղ (ծանրոց), որը ներառում է մեկ շաբաթվա հաշվարկով պարենային ապրանքներ՝  4 հոգու համար նախատեսված յուրաքանչյուր ծանրոց 10-12 հազար դրամ արժեքով։

Նախաձեռնությանը միացել են բազմաթիվ կամավորներ, բարերարներ, մեծ ու փոքր խանութներ: Բոլոր նրանք, ովքեր ցանկություն կունենան օգնել այս ընտանիքներին, կարող են նվիրատվությունն անել http://donate4gyumri.am/ կայքում, ինչպես նաև ֆինանսական հանգանակություն անել հետևյալ հաշվեհամարներով՝

USD 1570025820780101

EUR 1570025820780147

AMD 1570025820780200

RUB 1570025820780158

Իսկ կարիքավոր ընտանիքները ծրագրից օգտվելու համար կարող են գրանցվել shtapognutyun.am կայքում կամ զանգահարել թեժ գիծ +374  94 03 20 42 կամ +374 99 20 22 30 հեռախոսահամարներով:

Նշենք, որ Շիրակի մարզն ու Գյումրին շարունակում են մնալ Հայաստանի սոցիալապես ամենախոցելի վայրերից մեկը: Պաշտոնական տվյալներով մարզում կան 13.422 անապահով ընտանիքներ: