Պետությունն ի սկզբանե չգրանցված աշխատողների հանդեպ մերժողական քաղաքականությամբ հանդես եկավ. կարծիք

Երեկ ՀՀ Կառավարությունը հաստատեց նախագիծ, ըստ որի, օժանդակություն կտրամադրվի այն քաղաքացիներին, ովքեր 2020թ․-ի մարտի 13-ից մարտի 30-ը հանդիսացել են մի շարք ոլորտների աշխատողներ, սական ստեղծված իրավիճակից ելնելով՝ չեն աշխատում: Այդ ոլորտներն են՝ հյուրանոցային և հյուրատնային ծառայություններ,հանրային սննդի ծառայություններ, զբոսաշրջային ծառայություններ, վարսավիրանոցների և գեղեցկության սրահների ծառայություններ: Աշխատակիցներին տրվող միանվագ օժանդակությունը կլինի 68.000-136.000 դրամ: Թեմայի շուրջ ԼՈՒՐԵՐ.com-ի թղթակիցը զրուցեց տնտեսագետ, «Հայացք» վերլուծական կենտրոնի փորձագետ Լիլիա Ամիրխանյանի հետ:

«Կառավարության նախաձեռնությունն, անկախ գումարի չափից, բնականաբար, ողջունելի է, քանի որ կա արագ արձագանք: Մյուս կողմից՝ օժանդակությունը միանվագ է, իսկ մենք չգիտենք, թե այս վիճակը որքան կտևի, ուստի՝ շատ հնարավոր է, որ գումարի չափը դժգոհության պատճառ դառնա, քանի որ չի բավարարի մարդկանց կենսագործունեությունն ապահովելու համար: Բացի այս, նախաձեռնությունը վերաբերում է միայն նշված ոլորտների գրանցված աշխատողներին»,-ասաց նա:

Տնտեսագետը նշեց, որ Կառավարությունը բիզնեսի աջակցության ծրագիր է ներկայացնում՝ աշխատավարձերի վճարման համար նոր վարկերի ներգրավման տեսքով. «Սակայն ծրագիրը խնդրահարույց է, քանի որ բիզնեսի ներկայացուցիչը կարող է այլ ճանապարհ նախընտրել, օրինակ՝ աշխատողներին, աշխատավարձերը կրճատել, և արդյունքում՝ չստանձնել վարկային նոր պարտավորություն: Սա փաստում է, որ բիզնեսին օգնելու նախաձեռնությունը այնքան էլ արդյունավետ չէ»:

Անդրադառնալով այն հանգամանքին, որ օժանդակություն է տրամադրվելու միայն գրանցված աշխատողներին՝ Ամիրխանյանը ասաց, որ պետությունն ի սկզբանե չգրանցված աշխատողների հանդեպ մերժողական քաղաքականությամբ հանդես եկավ. «Ավելին՝ հայտարավեց, որ Հայաստանում չկան չգրանցված կամ օրավարձով աշխատողներ, ինչը, բնականաբար, իրականությանը չի համապատասխանում: Մյուս կողմից նաև ասվեց, որ չգրանցված աշխատողները որևէ կերպ չեն երևում, հետևաբար, չկան նրանց օժանդակություն ներկայացնելու լծակներ չկան: Իհարկե, դիտարկումը սխալ չէ, բայց արտակարգ իրավիճակում գնալ մերժողական քաղաքականության, այնքան էլ ճիշտ չէ»:

Նա նաև ընդգծեց, որ ստեղծված իրավիճակում պետության խնդիրը չպետք է լինի չգրանցված աշխատողներին կամ ստվերում աշխատողներին օրենքի դաշտ բերել. «Թեպետ օժանդակության ծրագիրը դրան էլ միտված է՝ օրենքի դաշտ բերել նրանց, ովքեր օրենքի դաշտում չեն: Իրականում, չգրանցված աշխատողներն այս իրավիճակում բարդ խնդրի առաջ են կանգնում: Նրանք կարող են դիմել ՊԵԿ՝ ասելով, որ աշխատել են որևէ կազմակերպությունում, բայց գրանցված չեն եղել, ապա ստանան միանվագ օժանդակությունը, բայց ի՞նչ կլինի հետագայում: Ամենայն հավանականությամբ՝ արտակարգ իրավիճակի ավարտից հետո այդ մարդը կմնա առանց աշխատանքի, քանի որ գործատուն նրան կհեռացնի աշխատանքից: Սա խնդիր է: Գործազուրկների թիվը շեշտակի կբարձրանա: Կամ՝ այդ աշխատողները ռիսկի չեն դիմի, չեն ներկայա ՊեԿ,  որպեսզի չկորցնեն իրենց հիմնական աշխատանքը»: