Արտաշատի թիվ 3 դպրոցում «մատների արանքով» են նայում հեռավար դասապրոցեսին. ծնողը դժգոհում է

Հասարակություն 1 Ապրիլ, 2020 16:24

Կորոնավիրուսով պայմանավորված՝ հեռավար դասապրոցեսին անցնելը արդյունավետ տարբերակ է, որպեսզի երեխաները պարապուրդի չմատնվեն և մեկ ամիս ոչինչ չանելու փոխարեն՝ հնարավորություն ունենան դասերով զբաղվելու: Սակայն պարզվում է՝ ոչ բոլոր դպրոցներում են դասերը լիարժեք անցկացվում: ԼՈՒՐԵՐ.com ահազանգած դպրոցական երեխայի ծնողներից մեկն իր դժգոհությունը հայտնեց՝ նշելով, որ Արարատի մարզի Արտաշատ քաղաքի թիվ 3 հիմնական դպրոցում հեռավար ուսուցումը հավուր պատշաճի չի իրականացվում:

Ծնողը նշեց, որ գրեթե մեկ ուսուցիչ է դասերը նորմալ անցկացնում, մյուսները «մատների արանքով» են նայում հեռավար դասապրոցեսին. «Ուսուցիչներից գրեթե ոչ ոք չի միանում ծրագրին, որպեսզի դաս անցկացնի, երեխաներն ամբողջ օրը պարապ են անցկացնում: Միայն մեկ-երկու ուսուցիչ հանձնարարություն է տալիս վայբերով, հետո պահանջում պատասխանները: Խնդիրն այն է, որ նրանցից որևէ մեկը երեխաներին դաս չի բացատրում, միայն պահանջում են, բայց չէ՞ որ երեխաներին պետք է նախ բացատրել, որպեսզի նրանք առաջադրանքները կարողանան հասկանալով կատարել»,- իր մտահոգությունը հայտնեց ծնողը:

Ըստ մեր զրուցակցի՝ թեև տեխնիկական խնդիրներ չկան, սակայն ուսուցիչները պատճառաբանում են, թե հեռավար ուսուցմամբ որևէ բան բացատրել չեն կարող, քանի որ իրենց համար շատ դժվար է:

Մեզ հետ զրույցում Արարատի մարզի Արտաշատ քաղաքի թիվ 3 հիմնական դպրոցի տնօրեն Մարգուշ Միրզոյանն էլ ասաց, որ մարզպետարանից պահանջել են երեխաների թիվը, որոնք ունեն սարքավորումների, կապի միջոցների խնդիրներ, փորձում են լուծումներ տալ խնդիրներին. «Աշակերտներ ու ուսուցիչներ կան, որոնք տեխնիկական խնդիրներ ունեն: Ինչ վերաբերում է ուսուցիչների աշխատանքին, ապա, օրինակ ես տեստեր եմ տալիս, բացատրում եմ, երեխաները պատասխանում են, արդեն նաև ծնողը պետք է հետևողական լինի: Ո՞նց կլինի ուսուցիչը դաս չբացատրի: Բայց սրանք լրիվ նոր մեթոդներ են, մենք երբեք նման ձևով չենք աշխատել, փորձում ենք ամեն բան անել, որպեսզի խնդիրները աստիճանաբար հարթվեն»,- ասաց դպրոցի տնօրենը:

Հիշեցնենք, որ Հայաստանում մարտի 16-ից ապրիլի 16-ը արտակարգ դրություն է հայտարարվել։ Աշակերտներն ու ուսանողները անցել են հեռավար ուսուցման։ ԿԳՄՍ նախարար Արայիկ Հարությունյանի հաղորդմամբ՝ ամեն օր Հանրային հեռուստաալիքի եթերի տարբեր ժամերի՝ 08:30-09:30 և 11:30-12:40, կլինեն տարբեր դասեր, դասախոսություններ են տեղադրվելու նաև Youtub–ում, որոնք դիտողներից ինտերնետ տրաֆիկ չեն տանելու։

Սոնա Հարությունյան