Մահճակալներ տեղադրվել են ոչ միայն մարզահամերգային համալիրի սպասասրահում, այլև ՀՀ մարզային տարբեր մարզասրահներում. Արսեն Թորոսյան

Այսօր Կառավարության նիստից հետո տեղի ունեցավ ՀՀ առողջապահության նախարար Արսեն Թորոսյանի ասուլիսը: Ի թիվս այլ հարցերի, նախարարն անդրադարձավ Երևանի մարզահամերգային համալիրի սպասասրահում տեղադրված մահճակալների հարցին՝ հայտնելով, որ մահճակալներ տեղադրվել են ոչ միայն մարզահամերգային համալիրի սպասասրահում, այլև ՀՀ մարզային տարբեր մարզասրահներում և դահլիճներում:

«Անհրաժեշտության դեպքում դրանք վերածվելու են հոսպիտալների միջին ծանրության, գուցե նաև ծանր վիճակում գտնվող պացիենտների համար: Մենք պետք է պատրաստ լինենք ցանկացած սցենարի, և դրա մեջ որևէ վատ բան չկա: Քննարկվում են նաև շատ ավելի վատ սցենարներ, ինչպես շատ այլ երկրներում է, երբ անգամ մարզադահլիճներում, դահլիճներում բոլոր հիվանդների համար տեղ չկա»,- նշեց Թորոսյանը:

Նախարարը  ընդգծեց, որ այդ վիճակին պետք է պատրաստ լինել, բայց նաև ամեն ինչ արվում է, դրան չհասնելու համար: