ՄԱԿ-ի զարգացման ծրագրերը մեծ չափով նպաստում են տնտեսության զարգացմանը
Տնտեսություն
Դեկտեմբերի 2-ին ՀՀ էկոնոմիկայի նախարարության և ՄԱԿ-ի Զարգացման ծրագրի (ՄԱԶԾ) հայաստանյան գրասենյակի միջև ստորագրվեց Փոխըմբռնման հուշագիր: ՀՀ էկոնոմիկայի նախարարության կողմից հուշագիրը ստորագրեց ՀՀ էկոնոմիկայի նախարար Տիգրան Դավթյանը, իսկ ՄԱԿ-ի Զարգացման ծրագրի կողմից՝ Հայաստանում ՄԱԿ-ի մշտական համակարգող, ՄԱԶԾ մշտական ներկայացուցիչ Դաֆինա Գեռչևան:
Հուշագրի հիմնական նպատակն է ՀՀ էկոնոմիկայի նախարարության և ՄԱԿ-ի զարգացման ծրագրի միջև ապահովել համագործակցության շրջանակ՝ նախարարության մասնագիտական կարողությունների զարգացման ուղղությամբ և օժանդակել կողմերի փոխգործակցությանը:
Տ. Դավթյանի խոսքով էկոնոմիկայի նախարարությունը ՄԱԿ-ի զարգացման ծրագրերի հետ բավականին երկար տարիներ արդյունավետորեն համագործակցում է, քանի որ ՄԱԿ-ի զարգացման ծրագրերը մեծ չափով նպաստում են հենց տնտեսության զարգացմանը:
Ըստ ստորագրված հուշագրի՝ ՄԱԶԾ-ն պետք է աջակցի նախարարության անձնակազմի համար նախատեսված մասնագիտական զարգացման ծրագրերի իրականացմանը, ինչպես նաև համագործակցի այլ դոնոր և գործընկեր կազմակերպությունների հետ՝ այդ ծրագրերի համար ֆինանսական միջոցներ հայթայթելու և համապատասխան ծրագրեր իրականացնելու նպատակով:
Նախարարությունն իր հերթին կաջակցի ՄԱԶԾ-ի աշխատանքներին՝ վերոնշյալ ծրագրերը սահուն և ժամանակին իրականացնելու գործում:
Հուշագրով նախատեսված համագործակցության նախնական ժամկետը հինգ տարի է: ՄԱԶԾ-ի և ՀՀ էկոնոմիկայի նախարարության գործողությունները կիրականացվեն երկուստեք համաձայնեցված տարեկան աշխատանքային ծրագրի հիման վրա:
ՈՒՂԻՂ ԵԹԵՐ
Ամենադիտված 
Ջուր չի լինի հուլիսի 28-ին ժամը 07.00-ից մինչև հուլիսի 29-ը ժամը 07.00-ն
