ՀԾԿՀ-ն ներկայացրել է Արցախի ապրանքային շուկաներում արձանագրված գնային փոփոխությունները

Նշված ժամանակահատվածում դիտարկված 43 ապրանքատեսակներից 13-ի գները աճել են, 8-ինը՝ նվազել, իսկ 22-ի գները մնացել են անփոփոխ: Արդյունքում նշված ապրանքատեսակների մասով արձանագրվել է 0.3 տոկոս գնաճ:

Դիտարկված 43 ապրանքատեսակներից գերիշխող դիրք ունեցող 10 տնտեսավարող սուբյեկտների կողմից իրացվում է 12 ապրանքատեսակ, որից ուսումնասիրվող ժամանակահատվածում գնային փոփոխություն արձանագրվել է 4 ապրանքատեսակի մասով՝ 1 գնաճ (հավի ձու՝ 16 դրամ կամ 37.2%) և 3 գնանկում (բենզին՝ 110 դրամ կամ 26.8%, դիզվառելիք 100 դրամ կամ 22.7% և ադամաթուզ՝ 50 դրամ կամ 7%):
Գնային փոփոխություններ արձանագրած նշված 4 շուկաներում գործող, գերիշխող դիրք ունեցող 5 տնտեսավարող սուբյեկտներից հանձնաժողովը պահանջել է տեղեկատվություն և նախաձեռնել ուսումնասիրություններ գնային փոփոխությունների հիմնավորվածությունը պարզելու և գների չհիմնավորված բարձրացումը կամ պահպանումը բացառելու նպատակով:

Ուսումնասիրվող ժամանակահատվածում գերիշխող դիրք ունեցող տնտեսավարող սուբյեկտի կողմից միակ գնաճ արձանագրած «Հավի ձու» ապրանքային շուկայում հանձնաժողովը ներկայումս իրականացնում է ուսումնասիրություն, սակայն պետք է նկատել, որ ի համեմատ նախորդ տարվա նույն ժամանակահատվածի նշված ապրանքատեսակի միջին գինը նվազել է 10 դրամ կամ 14.5%:

Գների մանրամասն ուսումնասիրությունը ներկայացված է գրաֆիկական պատկերներում և աղյուսակում: