Տիգրան Սարգսյան. «Հայաստանը, գտնվելով աշխարհաքաղաքական բարդ, տարածաշրջանում առնչվում է բազմաթիվ ռիսկերի հետ, որոնք նույնպես իրենց ազդեցությունն են թողնում մեր տնտեսության վրա»

Այսօր՝ դեկտեմբերի 4-ին, վարչապետ Տիգրան Սարգսյանը մասնակցել է Երեւանի Թումո ստեղծարար կենտրոնում մեկնարկած Հայաստանի Հանրապետական կուսակցության տնտեսական սեմինարին: Դրա ընթացքում ներկայացվել է Հայաստանի արդյունաբերական զարգացման ռազմավարությունը: Սեմինարին մասնակցել են նաև կառավարության և Ազգային Ժողովի, ինչպես նաև գործարար հատվածի ներկայացուցիչներ:

Ողջունելով սեմինարի մասնակիցներին` Տիգրան Սարգսյանը նշել է. «Մեր տնտեսական սեմինարն ունի երկու նպատակ: Առաջինն այն է, որ Հայաստանի Հանրապետական կուսակցությունը հանրությանն է ներկայացնում մեր երկրի համար կարևորագույն մի փաստաթուղթ և այս հարթակում մենք միասին կարողանալու ենք կազմակերպել քննարկումներ, ձևավորել մթնոլորտ և միջավայր, որի արդյունքում ներկայացված փաստաթուղթը կլրամշակվի` ներկայացված առաջարկությունների հիման վրա: Երկրորդ նպատակը նոր մշակույթի ձևավորումն է միջկուսակցական հարաբերություններում և հանրության լայն շրջանակների հնարավորություն տալն է` մասնակցելու նման կարևորագույն փաստաթղթերի քննարկման գործին», - ասել է վարչապետը:
Տիգրան Սարգսյանը նշել է, որ միայն մակրոտնտեսական կայունությունը բավարար չէ երկրի արդյունավետ կառավարման մոդելը զարգացնելու համար և մենք ունենք էական շեղում մակրոտնտեսական և միկրոտնտեսական մակարդակներում, որն իր բացասական ազդեցությունն է ունեցել ճգնաժամի ժամանակ: «Հայաստանը, գտնվելով աշխարհաքաղաքական բարդ, տարածաշրջանում առնչվում է բազմաթիվ ռիսկերի հետ, որոնք նույնպես իրենց ազդեցությունն են թողնում մեր տնտեսության վրա: Մենք այսօր ապրում ենք արագ փոփոխվող աշխարհում, որտեղ փոխադարձ ազդեցություններն օր-օրի ուժգնանում են և մեր քաղաքականությունը պետք է կառուցենք այնպես, որ այդ ազդեցությունը հասցնենք նվազագույնի, ունենանք բաց տնտեսական մոդել»: