«Գյումրի» բժշկական կենտրոնն ահազանգում է 17 աշխատակցի կորոնավիրուսով վարակված լինելու մասին

«Գյումրի» բժշկական կենտրոնի տնօրենն ահազանգում է՝  17 աշխատակցի մոտ կորոնավիրուս է,  ավելի քան 30 աշխատակից մեկուսացված է: Եվս մի քանի օր նման տեմպերի պահպանման  դեպքում, կենտրոնը բժիշկ չի ունենա: Խնդիրն այն է, որ կենտրոնը, չլինելով կորոնավիրուսի բուժմամբ զբաղվող հատուկ բուժհաստատություն, ընդունում է վարակակիրների. Շատ հիվանդներ, որոնք նմուշառման հետազոտություն չեն անցել, տեղափոխվում են «Գյումրի» բժշկական կենտրոն: Այստեղ, չնայած ախտանշաններին,  հիվանդին  չընդունել չեն կարող:

Ինչպես տեղեկացնում է «Արմենպրես»-ը «Գյումրի» բժշկական կենտրոնը մասնագիտացված չէ կորոնավիրուսը բուժելու համար, չի ստանում նաև համապատասխան ֆինանսավորում, բայց կատարում է այդ գործառույթը: «17 հոգի հիվանդ է, մեկուսացված է ավելի քան 30 բուժաշխատող: Այս պահի դրությամբ սահմանափակել ենք բոլոր պլանային վիրահատությունները: Նվազագույնի ենք հասցրել բաժանմունքների աշխատանքը: Կարող եմ դեպքեր ասել, երբ հիվանդը եկել է, նմուշառված չի եղել, բայց տանը ունեցել են կովիդով հիվանդ: Ծայրահեղ ծանր վիճակում ընդունել ենք, մի քանի ժամ անց մահացել է, հետմահու նմուշառումը հաստատել է վիրուսի առկայությունը ու չեն հերձել: Եթե նմուշառում կատարված չէ, մենք չենք կարող չընդունել: Ընդունում ենք, նմուշառում ենք կատարում, մինչ թեստավորման պատասխան ստանալը մնում է մեզ մոտ: Մեր բժիշկների գործառույթը չէր, բայց փաստացի հիմա կորոնավիրուսով հիվանդներին ընդունում ենք, բուժում, մինչև այդ հիվանդը տեղափոխվում է»,- «Արմենպրես»-ի հետ զրույցում նշեց  «Գյումրի» ԲԿ տնօրեն Արմեն Իսահակյանը։

Նա տեղեկացրեց, որ դիմել են առողջապահության նախարարություն, նաև առաջարկել՝ բժշկական կենտրոնը օրինական կարգով ընդգրկել համավարակի դեմ պայքարում: Այս պահին սպասում են պատասխանին: