Հայտնաբերվել են առանց դիմակի ուղևորափոխադրում իրականացնող վարորդներ

ՀՀ պարետի թիվ 110 որոշման պահանջների կատարման գործընթացն ապահովելու նպատակով հունիսի 21-ին՝ ՀՀ քաղաքաշինության, տեխնիկական և հրդեհային անվտանգության տեսչական մարմնի Երևանի տարածքային բաժնի տրանսպորտի անվտանգության մասնագետները ՀՀ ոստիկանության ծառայության աշխատակիցների հետ համատեղ վերահսկողական միջոցառումներ և մշտադիտարկումներ են իրականացրել Երևան քաղաքի Դավթաշեն վարչական շրջանում:

Գործառույթներ են իրականացվել կանոնավոր երթուղիներում շահագործվող տրանսպորտային և մարդատար տաքսի ավտոմոբիլներով ուղևորափոխադրում իրականացնող տրանսպորտային միջոցների նկատմամբ: Կանոնավոր երթուղիներում շահագործվող տրանսպորտային միջոցներում լուրջ խրավախախտման դեպքեր չեն արձանագրվել, սակայն հայտնաբերվել են որոշ թերություններ:

Մասնավորապես` Տեսչական մարմնի աշխատակիցների դիտարկման ընթացքում հայտնաբերվել է տրանսպորտային միջոցներ, որտեղ առկա ախտահանիչ հեղուկը պատշաճ որակի չի եղել: Տեղում վարորդներին տրվել են պարտադիր կատարման ցուցումներ՝ թերությունն անհապաղ շտկելու համար: Երթուղին շահագործող ընկերության կողմից թույլ տված թերությունը շտկվել է, և տվյալ երթուղու բոլոր տրանսպորտային միջոցները համալրվել են բարձր որակի ախտահանիչ հեղուկով:

Հիմնական իրավախախտման դեպքերը գրանցվել են մարդատար տաքսի ավտոմոբիլների դեպքում: Հայտնաբերվել են առանց դիմակի ուղևորափոխադրում իրականացնող վարորդներ: Արդյունքում կազմվել են վարչական իրավախախտման վերաբերյալ համապատասխան արձանագրություններ:

Ուժեղացված վերահսկողական աշխատանքներին զուգընթաց, Տեսչական մարմնի մասնագետները հայտնաբերված այլ թերությունների վերաբերյալ տեղում իրականացնում են խորհրդատվության, իրազեկման և բացատրական աշխատանքներ՝ հակահամաճարակային կանոններին խստագույնս հետևելու և COVID 19 համավարակի տարածումը կանխարգելելու նպատակով։

Տեսչական մարմնի կողմից հանրային տրանսպորտում ՀՀ Պարետոի որոշմամբ սահմանված անվտանգության կանոնների պահպանման նկատմամաբ վերահսկողությունը շարունակվում է հանրապետության ողջ տարածքում: