Տավուշի մարզի զբաղվածության 8-րդ ֆորումը Դիլիջանում

Դիլիջանում տեղի ունեցավ ՀՀ Տավուշի մարզի զբաղվածության 8-րդ ֆորումը, որի կազմակերպիչներն էին Գերմանիայի միջազգային համագործակցության ընկերությունը, Տավուշի մարզպետարանը և ԴՎՎ ինթերնեյշնլ միջազգային կազմակերպության հայաստանյան գրասենյակի մասնաճյուղը:

Ֆորումի աշխատանքներին մասնակցում էին մարզի պետական և մասնավոր հատվածի, բիզնես կառույցների, հասարակական ու միջազգային կազմակերպությունների, ուսումնական հաստատությունների ներկայացուցիչներ:

Երկօրյա ֆորումի աշխատանքները բացեց ԴՎՎ ինթերնեյշնլի Հայաստանյան գրասենյակի ղեկավար Նազարեթ Նազարեթյանը: Ողջույնի խոսք ասաց Մասնավոր հատվածի զարգացում Հարավային Կովկասում ծրագրի Հայաստանի թիմի ղեկավար դոկտոր Իրինա Քաուշը:

Քննարկվող օրակարգային հարցերը վերաբերում էին Տավուշի մարզում զբաղվածությանն առնչվող խնդիրներին ու դրանց լուծման ուղղությամբ տարվող գործողությունների հստակեցմանը, որոնց շուրջ էլ ծավալվեց ակտիվ երկխոսություն՝ տեղական շահագրգիռ կողմերի միջև:

Այնուհետև տեղի ունեցան «Տավուշի մարզի զբաղվածության տեսլականը 3 տարի հետո» թեմայով խմբային քննարկումներ՝ ըստ սեկտորների: Աշխատանքային երկրորդ օրն սկսվեց առաջին օրվա ամփոփմամբ, որին հաջորդեցին խմբային աշխատանքների արդյունքների ներկայացման և քննարկման աշխատանքները, կատարվեցին վերլուծություններր, որոշվեցին հետագա քայլերը: