Օբաման մտահոգված է ադրբեջանցի մարդասպանին ներում շնորհելու հարցով

Agence France presse գործակալությունը, հղում անելով Սպիտակ Տանը, իր հոդվածում հայտնում է, որ նախագահ Բարաք Օբաման «խորապես մտահոգված է» հայազգի սպային կացնահարած ադրբերանցի զինվորին ներում շնորհելու փաստով:

Ադրբեջանի նախագահ Իլհամ Ալիևը իր հրամանագրում նշել է, որ մարդասպան Ռամիլ Սա‎ֆարովը «պետք է ազատվի իր պատիժը կրելուց»` օդանավով Բուդապեշտից վերադառնալուն պես, որտեղ նա կրում էր ցմահ բանտարկության պատիժը 2004 թվականի սպանության համար:

«Նախագահ Օբաման խորապես մտահոգված է այսօրվա հայտարարությամբ այն մասին, որ ադրբեջանական նախագահը ներում է շնորհել Ռամիլ Սա‎ֆարովին` Հունգարիայից վերջինիս վերադարձից անմիջապես հետո»,- ասել է Ազգային անվտանգության խորհրդի խոսնակ Թոմի Վիետորը:

«Մենք հայտնում ենք մեր հիասթափությունը ադրբեջանական իշխանություններին` այս որոշման կապակցությամբ»,- ավելացրել է Վիետորը:

«Այս գործողությունը դեմ է տարածաշրջանային լարվածությունը կրճատելու և խաղաղություն ապահովելու չդադարող ջանքերին: ԱՄՆ բացատրություն է պահանջում Հունգարիայից՝ կապված նրա՝ Սա‎արովին Ադրբեջան տեղափոխելու որոշման հետ»:

Հայաստանը սառեցրեց կապերը Հունգարիայի հետ, երբ Բուդապեշտը ադրբեջանցի սպային հանձնեց Բաքվին: Հայաստանի նախագահ Սերժ Սարգսյանը հայտարարել է, որ այս միջադեպից հետո իր զորքերը բերվել են «բարձր պատրաստականության», ինչը սրել է լարվածությունը թշնամիների միջև, որոնք պատերազմ են մղում դեռևս 1990-երից՝ պայքարելով վիճելի տարածք համարվող Լեռնային Ղարաբաղի համար:

Սա‎ֆարովը կացնահարել էր հայազգի սպա Գուրգեն Մարգարյանին Բուդապեշտի ռազմական ակադեմիայում, որտեղ նախկին Խորհրդային Միության կազմում հարևան պետությունների սպաները մասնակցում էին ՆԱՏՕ-ի կողմից կազմակերպված անգլերեն լեզվի դասընթացների:

Սա‎ֆարովի դատապաշտպանները պնդում էին, որ վերջինս այդ պահին հոգեկան ծանր վիճակում է գտնվել՝ հայկական ուժերի հետ պատերազմում իր բարեկամներից մեկի մահվան պատճառով, պնդում էին նաև, որ Մարգարյանը իբր վիրավորանք է հասցրել Սա‎‎ֆարովի երկրին:

Երկու պետությունների միջև 1994 թվականին կնքված զինադադարից հետո, չնայած տարիներ տևող բանակցություններին, դեռևս հաշտության պայմանագիր չի կնքվել: Ադրբեջանը սպառնում է ուժի դիմել, եթե խաղաղ բանակցությունները արդյունք չտան, մինչդեռ Հայաստանը խոստանում է համապատասխան փոխհատուցում ցանկացած տեսակի ուժի կիրառման դեպքում: