«2020 թ.-ին «Կանաչ Տնտեսության» մասնաբաժինն ամբողջ համաշխարհային տնտեսության մեջ կլինի 3.2 տրիլիոն դոլլար». Ջ. Մ. Ֆորբս

Դեկտեմբերի 6-ին Արմենիա–Մարիոթ հյուրանոցում տեղի ունեցավ ԳՄՀԸ–ի (Գերմանիայի միջազգային համագործակցության ընկերություն) Հայաստանյան գրասենյակի կազմակերպած համաժողովը, որը կրում էր «Կանաչ Տնտեսություն» խորագիրը:

Համաժողովը կազմակերպվել է ԳՄՀԸ տարեկան նախաձեռնության շրջանակներում, որը 2011–ի համար կրում է «Պատասխանատու տնտեսական գործունեություն. կայուն զարգացում» խորագիրը։ Այն նպատակ ունի հայտնաբերելու պոտենցիալ նորարարական լուծումներ, որոնք հող կնախապատրաստեն «անվնաս» տնտեսական զարգացման համար։

Համաժողովին նախորդեց լրագրողների հետ հանդիպումը, որի ընթացքում ԳՄՀԸ Հայաստանյան գրասենյակի տնօրեն Ջեյմս Մակբեթ Ֆորբսը և ՀՀ–ում ԳԴՀ արտակարգ և լիազոր դեսպան Հանս–Յոխեն Շմիդթը խոսեցին «Կանաչ Տնտեսության» մասին։

«Այս իրողությունը շատ կարևոր նշանակություն ունի Գերմանիայի կառավարության համար։ Նաև համոզված ենք, որ Հայաստանի կառավարությունը նույնպես մեծ նշանակություն է տալիս այդ ամենին։ Եվ կարծում եմ, որ «Կանաչ տնտեսության» վերաբերյալ մեր երկկողմանի համագործակցությունը շատ հզոր է», – նշեց Ջեյմս Մ. Ֆորբսը։

Նրա խոսքերով՝ միայն Գերմանիայում 1 մլն 800 հազար գերմանացի մասնագետ աշխատում է բնապահպանական և, այսպես կոչված, «Կանաչ տնտեսության» ոլորտում։ Եվ «Կանաչ Տնտեսություն»-ը, որը ոչ միայն բնապահպանական խնդիրներին է վերբերում և բնությանը չվնասելու հարցին, տարեկան 80 մլրդ դոլլար ներդրում է ունենում Գերմանիայի ազգային տնտեսության մեջ։

Ֆորբսը հայտնեց, որ, ընդհանուր հաշվարկով առաջ շարժվելու դեպքում,  2020 թ.–ին «Կանաչ Տնտեսության» մասնաբաժինն ամբողջ համաշխարհային տնտեսության մեջ կլինի 3.2 տրիլիոն դոլլար։

«Ամենակարևորը քաղաքական որոշումն է, որ պետք է յուրաքանչյուր երկրի իշխանություն կատարի և որոշի ավելի շատ ներդրում կատարել «Կանաչ Տնտեսության» մեջ՝ կայուն տնտեսության զարգացման համար», – հավատացած է նա։