ՀՀ–ում Գերմանիայի դեսպան. «Բնության ոչնչացումն երկրի տնտեսության համար խիստ բացասական նշանակություն է ունենում»

Այսօր, ԳՄՀԸ կազմակերպած «Կանաչ Տնտեսություն» համաժողովին նախորդող ասուլիսի ընթացքում, ՀՀ–ում Գերմանիայի Դաշնային Հանրապետության արտակարգ և լիազոր դեսպան Հանս–Յոխեն Շմիդթը կարծիք հայտենց, որ բնության պահպանությունը ավելի շահավետ է, քան դրա աղտոտումը։

«Պետք է նաև հասկանալ, որ բնության ոչնչացումը, երկարաժամկետ առումով, երկրի տնտեսության համար խիստ բացասական նշանակություն է ունենում։ Օրինակ՝ հենց ոչնչացումից հետո կամ աղբի մաքրման՝ աղբահանության աշխատանքը. դրա ուղղությամբ այնուհետև բավականին մեծ ծախսեր են իրականցվում, որպեսզի այդ ամենն ուղղվի», - նշեց դեսպանը։

Պ–ն Շմիդթը մի օրինակ բերեց իր փորձից, երբ ինքը դեռ նոր էր մտնում արտաքին հարաբերությունների դաշտ, իր պրոֆեսորները սովորեցնում էին, որ իրար չեն հակասում տնտեսական զարգացման նախաձեռնությունների իրականացումը և բնության պահպանությանն ուղղված գործողությունները։ «Կախված է նրանից, թե ի՞նչ եք դուք հասկանում՝ տնտեսական աճ ասելով», – բացատրեց նա։

Օրինակ՝ հայ–գերմանական ծրագրերի շրջանակում իրենք հատուկ նպատակային ֆինանսական հովանավորություն ունեն, որոնք ուղղված են բնական ռեսուրսների պահպանմանը, զարգացմանը և կատարելագործմանը։ Ըստ դեսպանի՝ բնակարանների և տների ջերմամեկուսացման մեջ ներդրում անելը մեծ նպաստ կբերի նաև էներգիայի խնայողության ոլորտում։ Հ.Յ. Շմիդթի խոսքերով՝ մյուս ուղղությունն այն է, որ փորձում են Հայաստանի իշխանությանն ապացուցել, որ, մեծ ներդրում կատարելով աղբահանության և աղբի «կառավարման» մեջ, հետագայում մեծ շահույթ և մեծ եկամուտներ կարելի է ստանալ (օրինակ՝ Վանաձորի պիլոտային գործարանը)։