Կահիրեում Սիրիայի դեսպանատան մոտ տեղի ունեցած բախումների հետևանքով տուժել է տասը մարդ

Նախորդ գիշեր եգիպտական մայրաքաղաքում տեղակայված Սիրիայի դեսպանատան մոտ տեղի ունեցած դաժան բախումների արդյունքում տասնյակ մարդիկ են տուժել. այդ մասին գրում է ИТАР-ТАСС-ը։ «Ալ Յաում ալ Սաբիա» թերթը հաղորդել է, որ վիրավորների թիվը հասել է 85-ի, մինչդեռ Եգիպտոսի առողջապահության նախարարության տվյալներով վիրավորների թիվը 33 է։

Երեքշաբթի օրը՝ ուշ երեկոյան սիրիական դեսպանատանը հարող հրապարակում բախումներ են ծագել Բաշար ալ Ասադի կողմակիցների և ոստիկանների միջև։ Տասնյակ երիտասարդներ բողոքի ակցիա են կազմակերպել՝ պաշտոնանկություն պահանջելով Սիրիայի նախագահից։ Դեսպանատան շենքին նրանք ամրացրել են, այսպես կոչված, Սիրիայի ազատ բանակի դրոշը և ստիպել դեսպանին լքել հաստատությունը։ Երբ անվտանգության ուժերը փորձել են կանգնեցնել ցուցարարներին, նրանց ուղղությամբ քարեր և վառվող լուծույթով շշեր են նետվել։ Ցուցարարներին ցրելու համար ոստիկանները արցունքաբեր գազ են կիրառել։

Անկարգությունները շարունակվել են ողջ գիշեր։ Միայն  առավոտյան է հաջողվել հսկողության տակ առնել այն տարածքը, որտեղ տեղակայված է սիրիական դիվանագիտական ներկայացուցչությունը։ Տասը հոգի ձերբակալվել են։

Կոնֆլիկտի սկզբից ի վեր սիրիական ընդդիմադիրները մի քանի անգամ անկարգություններ են կազմակերպել Կահիրեում Դամասկոսի դեսպանատան շենքում։ Հարձակվողները ջարդել են ապակիները, փչացրել կահույքը և տեխնիկան, մի քանի անգամ այրել շենքը։ Պահակներին չի հաջողվել կանգնեցնել մոլեգնած ամբոխին։ Դա հաջողվել է անել միայն ՆԳՆ հատուկ ջոկատների օգնությամբ։ Այս դեպքերից հետո դեսպանատան պաշտպանությունը զգալիորեն խստացել է։