The Guardian. Հիլարի Քլինթոնը համաձայնության չի եկել Չինաստանի հետ Սիրիայի հարցով

Այսօր The Guardian-ն անդրադարձել է Հիլարի Քլինթոնի՝ երեկ Չինաստան կատարած այցին։ ԱՄՆ պետքարտուղարի և Չինաստանի ղեկավարների միջև Սիրիայի ճգնաժամի և Պեկինի՝ իր հարևանների հետ տարածքային խնդիրների կարգավորմանն ուղղված բանակցություններն արդյունք չեն տվել։

Քլինթոնը հանդիպել է Չինաստանի նախագահ Հու Ցզինտաոյի, արտաքին գործերի նախարար Յան Ձիեչիի և այլ բարձրաստիճան պաշտոնյաների հետ և պահանջել դադարեցնել Սիրիայի նախագահ Բաշար Ասադի վարչակարգին տրվելիք աջակցությունը։ Քլինթոնը նաև կոչ է արել ավելի ճկուն լինել նավթով հարուստ Արևելաչինական ծովի հետ կապված լարվածությունը մեղմացելու հարցում։

Քլինթոնի և Յանգի մեկնաբանությունները չորեքշաբթի օրը ցույց տվեցին, որ երկու պետությունների միջև խոր տարաձայնություններ կան այդ հարցերի շուրջ։ Այնուհանդերձ, երկու կողմերն էլ ունեն համատեղ աշխատանքը շարունակելու դիրքորոշում՝ անկախ տարաձայնություններից։

ԱՄՆ և մյուս պետությունները մտահոգ են, որ Ռուսաստանն ու Չինաստանը կրկին ու կրկին օգտվում են ՄԱԿ-ի Անվտանգության խորհրդում իրենց վետոյի իրավունքից՝ թույլ չտալով դիմել այնպիսի քայլերի, որոնք կհանգեցնեն Բաշար Ասադի վարչակարգի նկատմամբ պատժամիջոցներին։ Չինաստանը պնդում է, որ Սիրիայի քաղաքացիական պատերազմը պետք է կարգավորվի բանակացությունների միջոցով, իսկ արտաքին ճնշումը պետք է բացառվի։

«Գաղտնիք չէ, որ մենք հիասթափված ենք Չինաստանի և Ռուսաստանի՝ Անվտանգության խորհրդի պատժամիջոցները կանխելու քաղաքականությունից, սակայն մենք կշարունակենք ջանքեր գործադրել, որպեսզի գտնենք Սիրիայում բռնությունները դադարեցնելու լավագույն ուղին»,- հայտարարել է ԱՄՆ պետքարտուղարը։