Le Monde. Հարաբերությունները թեժանում են Հայաստանի և Ադրբեջանի միջև

Le Monde պարբերականն իր հոդվածներից մեկում անդրադարձել է վերջերս Հարավային Կովկասում բռնկված դիվանագիտական սկանդալին։

Իրանի, Ռուսաստանի և Թուրքիայի միջև տեղակայված նավթով հարուստ Հարավային Կովկասի պես «վառոդի տակառին» մի կայծն էլ է բավական, որպեսզի կրակ բռնկվի։ Օգոստոսի 31-ին ներում շնորհելով 2004 թվականի փետրվարին Բուդապեշտում հայազգի սպայի սպանության հեղինակ Ռամիլ Սաֆարովին՝ Ադրբեջանը վերակենդանացրեց Լեռնային Ղարաբաղի շուրջ 1988 թվականին սկիզբ առած տարածքային վեճի փշոտ հարցը, որը մինչ այսօր դեռևս լուծում չի ստացել։

Երևանը շատ վատ ընդունեց 2006 թվականին ցմահ բանտարկության դատապարտված Սաֆարովին ոչ միայն ավելի բարձր զինվորական կոչում տալու, այլև հայրենիքում  նրան «ազգային հերոսի» պես ընդունելու փաստը։

Հունգարիան, հավանություն տալով Սաֆարովի հետ հանձնմանը, իրեն դրեց քննադատությունների հարվածի տակ։

Եվրամիությունը, որը նույնպես վախենում է տարածաշրջանում կրակի բռնկումից, քննադատել է Բուդապեշտի նախաձեռնությունը։ Մի՞թե նոր պատերազմ է նախապատրաստվում։ Փորձագետներից մեկը, դիտարկելով վատթարագույն սցենարը, նշել է, որ Հայաստանն ու Ադրբեջանը այլևս «հաշտությունը չեն դիտարկում որպես առաջնահերթություն»։ Այս վերջին օրերի իրադարձությունները երկու ճամբարների ուժերը կարող են ծառայեցնել ի շահ իրենց նպատակների։