Շուրջ 2000 հայ է մասնակցել վերականգնված եկեղեցում մատուցված պատարագին

Շուրջ 2000 հայ էր Թուրքիայից և Սփյուռքից եկել  Ախթամար կղզու՝ վերջերս վերականգնված Սուրբ Խաչ եկեղեցի՝ ամենամյա պատարագին մասնակցելու համար. հաղորդում է Agence France Presse-ը։

Նավերը Թուրքիայից, Հայաստանից և Եվրոպայից ժամանած ուխտագնացներին տեղափոխում էին Վանա լճի Ախթամար կղզու Սուրբ Խաչ եկեղեցի։

Թուրքական իշխանությունները վերականգնել էին 10-րդ դարում կառուցած եկեղեցին 2005  և 2007 թվականներին, որից հետո եկեղեցում թանգարան էին հիմնել։ Ըստ Թուրքիայի զբոսաշրջության նախարարության՝ 2010 թվականին եկեղեցին ընդունել էր շուրջ 30.000 այցելու։ Նմանատիպ արդյունք է գրանցվել նաև 2011 թվականին։

Պոլսի հայոց պատրիարքի տեղապահ, արքեպիսկոպոս Արամ Աթեշյանը ղեկավարում էր այս տարվա պատարագը, որին մասնակցում էր ավելի քան 2000 հավատացյալ։ Նրանցից միայն մի քանի տասնյակը հնարավորություն ունեցան եկեղեցի մտնել, մնացածը դրսից էին հետևում պատարագին։

Հավաքվածներն աղոթեցին աշխարհում խաղաղության համար, երբ Թուրքիայի հարևան Սիրիայում, որտեղ ևս հայկական մեծ համայնք կա, դեռևս մոլեգնում է 2011թվականին սկիզբ առած կոնֆլիկտը, և որի հետևանքով արդեն հազարավոր զոհեր կան։

Այժմ Թուրքիայի հայկական համայնքում հաշվվում է 70.000 հայ, որոնց մեծ մասը կենտրոնացված է Ստամբուլում։