Le Monde. Միթ Ռոմնին ասել է, որ Իրանը Օբամայի ամենամեծ ձախողումն է

Հանրապետականների թեկնածու Միթ Ռոմնին հայտարարել է, որ Օբամայի կողմից Իրանի միջուկային ծրագրին անդրադառնալը թերևս նրա «ամենամեծ ձախողումն է եղել»։ Նա նաև խոստացել է, որ ընտրվելու դեպքում այդ հարցում նա բացարձակ այլ մոտեցում կցուցաբերի. գրում է Le Monde-ը։

«Դա, երևի, Օբամայի ամենամեծ սխալն է, քանի որ հարցը վերաբերում է ամենամեծ վտանգին, որը կարող է սպառնալ ԱՄՆ-ին և ամբողջ աշխարհին. դա միջուկային զենքով Իրանն է։ Նախագահին չհաջողվեց մեզ հեռացնել միջուկային Իրանից սպառնացող վտանգից, և այժմ, փաստորեն, Իրանն ավելի մոտ է միջուկային զենքի ստեղծմանը, քան չորս տարի առաջ։

 Նախագահ Օբամայի քաղաքականությունն ուղղված էր Իրանի նախագահ Մահմուդ Ահմադինեջադի հետ հարաբերությունների սերտացմանը։ Այդ քաղաքականությունը չաշխատեց ու բերեց նրան, որ Իրանը ավելի է մոտեցել միջուկային զենք ստեղծելու իր նպատակին։ Ես այս հարցի նկատմամբ այլ մոտեցումներ ունեմ։ Պետք է այնպիսի պատժամիջոցներ կիրառել, որոնք իսկապես կաթվածահար կանեն պետությունը. դա շատ վաղուց պետք է արվեր»,-ավելացրել է Ռոմնին։

Հիշեցնենք, որ ներկայումս Իրանը ԱՄՆ-ի և Եվրոպայի կողմից ենթարկվում է խիստ պատժամիջոցների։ Միևնույն ժամանակ Իսրայելը սպառնում է, որ Իրանին կենթարկի էլեկտրամագնիսական հարձակման՝ կաթվածահար անելով երկրի տրանսպորտային և հաղորդակցության ցանցերը։