ՀՀ գյուղնախարարն ընդունել է Լիբանանի արդյունաբերության նախարարին

ՀՀ գյուղատնտեսության նախարար Սերգո Կարապետյանը 2011 թվականի դեկտեմբերի 8- ին ընդունեց Լիբանանի Հանրապետության նախագահ Միշել Սուլեյմանի` ՀՀ կատարած պաշտոնական պատվիրակության կազմում ընդգրկված Լիբանանի Հանրապետության արդյունաբերության նախարար Վրեժ Սաբունջյանին` վերջինիս խնդրանքով: Հանդիպումը կրում էր ճանաչողական բնույթ: Ողջունելով միմյանց` զրուցակիցները կարծիք հայտնեցին, որ անհրաժեշտ է ակտիվացնել հատկապես երկկողմ տնտեսական համագործակցությունը, քանի որ առկա է մեծ ներուժ այն զարգացնելու համար: Պարոն Սաբունջյանը հետաքրքրվեց, թե Հայաստանում ինչպիսի ագրոարդյունաբերական ապրանքներ են թողարկվում և ցանկություն հայտնեց ստանալ ավելի մանրամասն տեղեկություններ` Հայաստանից Լիբանան այդ ապրանքների արտահանում կազմակերպելու նպատակով: ՀՀ գյուղատնտեսության նախարարը, համակարծիք լինելով նման համագործակցություն ծավալելու առաջարկին, իր հերթին հավելեց, որ ոչ միայն փոխադարձ արտահանումներն, այլ նաև համատեղ ձեռնարկությունների ստեղծումն ու երկկողմ ներդրումները կարող են լինել համագործակցության լավագույն օրինակ: Հյուրի խնդրանքով նախարար Կարապետյանը հակիրճ ներկայացրեց ՀՀ գյուղատնտեսության վիճակը և համոզմունք հայտնեց, որ այս տարվա տնտեսական ցուցանիշներում կգրանցվեն երկնիշ տվյալներ: Պարոն Սաբունջյանը տեղեկացրեց, որ Լիբանանի գյուղատնտեսության նախարարությունը պատրաստակամություն է հայտնել առաջիկայում ՀՀ գյուղատնտեսության նախարարության հետ ստորագրել երկկողմ համագործակցության գործնական ծրագիր, որն ընդունվեց նախարար Սերգո Կարապետյանի կողմից: Զրույցն անցավ ջերմ մթնոլորտում: