2014 թ. հունվարի 1-ից քաղաքային համայնքներում` բժշկական հաստատություններում 300.000 դրամը գերազանցող բոլոր տեսակի վճարումներն ընդունվելու են անկանխիկ ձևով

Տնտեսություն 9 Դեկտեմբեր, 2011 9:23

ՀՀ ԿԲ նախագահի տեղակալ Ներսես Երիցյանը դեկտեմբերի 8-ին ԱԺ քառօրյա նիստերի ժամանակ առաջին ընթերցումով քննարկման ներկայացրեց «Կանխիկ գործառնությունների սահմանափակման մասին», «ՀՀ քաղաքացիական օրենսգրքում լրացում եւ փոփոխություններ կատարելու մասին», «Արժութային կարգավորման եւ արժութային վերահսկողության մասին» ՀՀ օրենքում լրացումներ եւ փոփոխություն կատարելու մասին» եւ «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» օրենսդրական փաթեթը: Նշվեց, որ օրենսդրական փոփոխություններով ՀՀ տարածքում 2012 թ. հուլիսի 1-ից քաղաքացիների միջեւ անկանխիկ ձեւով պետք է իրականացվի ապրանքների (գույքի) օտարման, ապրանքների (գույքի) օգտագործման, աշխատանքների կատարման եւ ծառայությունների մատուցման 3 միլիոն դրամը գերազանցող գործարքների վճարումների ստացում: Անկանխիկ ձեւով են ընդունվելու սկսած 2012 թ. հուլիսի 1-ից Երեւան քաղաքում, 2013 թ. հունվարի 1-ից մարզերի վարչական կենտրոններում, 2014 թ. հունվարի 1-ից քաղաքային համայնքներում՝ բժշկական հաստատություններում 300.000 դրամը գերազանցող բոլոր տեսակի վճարումները, կրթական հաստատություններում ուսման վճարներն անկախ չափից եւ 100.000 դրամը գերազանցող այլ վճարները: Բացառությամբ հաստատագրված կամ արտոնագրային վճար վճարողների, 2013 թ. հուլիսի 1-ից Երեւան քաղաքում, 2014 թ. հունվարի 1-ից քաղաքային համայնքներում գործող եւ 200 քառակուսի մետրը գերազանցող ընդհանուր մակերես ունեցող առեւտրի օբյեկտներում, հանրային սննդի օբյեկտներում, հյուրանոցներում, բժշկական կազմակերպություններում տեղադրվում, իսկ հաճախորդի ցանկությամբ պարտադիր կիրառվում են վճարային քարտեր սպասարկող սարքեր:

ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գագիկ Մինասյանը, ներկայացնելով հանձնաժողովի դրական եզրակացությունը, նշեց, որ օրենսդրական փաթեթը բազմաթիվ քննարկումների արդյունքում բարեփոխված տարբերակ է եւ համահունչ է վերջերս Ազգային ժողովի կողմից ընդունված «Դրամարկղային գործառնությունների մասին» օրենքին:

ԱԺ պատգամավոր Էռնեստ Սողոմոնյանը, անդրադառնալով օրենսդրական փաթեթին, կարծիք հայտնեց, որ տնտեսագիտական տեսանկյունից այն վատը չէ, սակայն դրա ընդունումը վաղաժամ է: ԱԺ պատգամավոր Արտակ Դավթյանն այս առումով հակառակ կարծիք հայտնեց. փաթեթի ընդունումն անգամ ուշացել է: Նա գտնում է, որ օրենսդրական փոփոխություններով հարկային վարչարարությունը նոր հարթություն տեղափոխելու լավ նախադրյալներ կստեղծվեն:

Ամփոփիչ ելույթում Գագիկ Մինասյանը նշեց, որ փաթեթը համահունչ է ստեղծված իրավական դաշտին եւ կնպաստի անկանխիկ գործառույթների խորացմանը, ինչը կարող է էական նշանակություն ունենալ երկրի համար: Նա անդրադարձավ նաեւ հնչած այն տեսակետին, թե քարտի օգտագործումը կարող է պարտադրանք հանդիսանալ շարքային քաղաքացու համար: Պարոն Մինասյանը հստակեցրեց, որ ոչ մի պարտադրանք չի դրվում, քարտերը պետք է օգտագործեն մեծ տարածքով սպասարկման օբյեկտներ ունեցող քաղաքացիները:

Եզրափակիչ ելույթ ունեցավ նաեւ Ներսես Երիցյանը՝ հիշեցնելով, որ օրենսդրական փաթեթը էական փոփոխություններ է կրել: Նա հորդորեց պատգամավորներին առաջինից երկրորդ ընթերցում ներկայացնել առաջարկներ: