Աղբահանության նոր վարձավճարները

Երևանի ավագանին կողմ է քվեարկել Երևան քաղաքում աղբահանությունը կազմակերպելու համար տեղական վճարների՝ 2012 թ.–ի դրույքաչափերը սահմանելու մասին որոշմանը։

«Որոշման ընդունման անհրաժեշտությունը պայմանավորված է ՀՀ Ազգային ժողովի ընդունած «Տեղական տուրքերի և վճարների մասին» Հայաստանի Հանրապետության օրենքի 8-րդ հոդվածի և «Աղբահանության և սանիտարական մաքրման մասին» ՀՀ օրենքի պահանջով, համաձայն որի՝ աղբահանության վճարը, համայնքի ավագանու սահմանած չափով, համայնքի բյուջե կամ արտաբյուջե գանձվող պարտադիր գանձույթ է», - որոշման նախահիծը ներկայացնելիս հայտարարել է Քաղաքապետարանի աշխատակազմի ֆինանսական վարչության պետը:

Երևանի քաղաքապետ Տարոն Մարգարյանը նշել է, որ որոշման ընդունումը կնպաստի վարձավճարների գանձման գործընթացի կանոնակարգմանը:

«Որոշման ընդունումով՝ բնակչության համար ֆինանսական որևէ լրացուցիչ բեռ չի առաջանում», - նշել է քաղաքապետը։

Երևանի քաղաքային համայնքում 2012 թվականին աղբահանությունը կազմակերպելու համար, ավագանու որոշմամբ, սահմանվել են աղբահանության վճարի հետևյալ դրույքաչափերը.

1. Կենցաղային աղբի համար. բնակվող յուրաքանչյուր բնակչի համար՝ ամսական 200 ՀՀ դրամ։

2. Ոչ կենցաղային և խոշոր եզրաչափի աղբի համար՝ ըստ ծավալի. մեկ խորանարդ մետր աղբի համար՝ ամսական 2500 ՀՀ դրամ։

3. Երևան քաղաքում շինարարական և խոշոր եզրաչափի մեկ խորանարդ մետր աղբի հավաքման և փոխադրման թույլտվության համար՝ տեղական վճարի 2012 թվականի դրույքաչափը սահմանել 500 դրամ։