Die Welt. Իսրայելի վարչապետը միջամտել է ԱՄՆ-ի ընտրական քարոզարշավին

Իսրայելի վարչապետ Նաթանյաուն ամերիկյան հեռուստատեսությամբ միջամտել է նախագահական ընտրարշավին՝ անուղղակիորեն խորհուրդ տալով ամերիկացիներին այնպիսի նախագահ ընտրել, որը վճռական քայլեր կձեռնարկի Իրանի դեմ։

Նախագահական ընտրություններից երկու ամիս առաջ Իսրայելի վարչապետ Բենիամին Նաթանյաուն նման ոչ անմիջական կեպով միջամտել է ԱՄՆ-ում ընտրական արշավին։ Կիրակի օրը երեկոյան նա ամերիկյան հեռուստահաղորդավարներից մեկի հետ իր հարցազրույցի ընթացքում հայտարարել է, որ ԱՄՆ-ի քաղաքացիները պետք է այնպիսի նախագահ ընտրեն, որը պատրաստ է սահմանել Իրանի դեմ, այսպես կոչված, «Կարմիր գիծ»-ը։ «Ժամանակը շատ սուղ է, անհրաժեշտ է Իրանի միջուկային ծրագրի դեմ վճռականորեն պայքարել»,-ասել է Նաթանյաուն։

Նաթանյաուն հայտարարել է, որ ինքը չեզոքություն է պահպանում ԱՄՆ-ում նախագահական ընտրարշավի մեջ։ Նա հրապարակայնորեն համակրանք չի հայտնել նախագահի երկու թեկնածուներից և ոչ մեկի հանդեպ։ Սակայն գաղտնիք չէ այն հանգամանքը, որ Նաթանյաուն ակնհայտորեն դժգոհ է Օբամայի՝ Մերձավոր Արևելքում վարած քաղաքականությունից։ «Ես վստահ եմ, որ բոլոր ամերիկացիների, բոլոր քաղաքական ուղղությունների միասնական շահերից է բխում կանգնեցնել Իրանի միջուկային ծրագիրը։ Ներկայիս ռեժիմը վատագույն ազդակներն է ուղարկում Մերձավոր Արևելք, ինչի հետևանքներն այսօր մենք տեսնում ենք»,-իր խոսքում նշել է նա։