Tehran Times. Սիրիայի հարցով Իրանի նոր առաջարկները

Իրանի արտաքին գործերի նախարար Ալի Աքբար Սալեհին առաջարկել է հանդիպում կազմակերպել Սիրիայի հարցով դիտորդական խմբի անդամների միջև, որոնց շարքին են պատկանում Իրանի, Եգիպտոսի, Սաուդյան Արաբիայի և Թուրքիայի ներկայացուցիչները։

Ըստ Իրանի ԱԳՆ-ի հայտարարության՝ Սալեհին նույն օրը Կահիրեում կայացած նախարարական հանդիպման ընթացքում որոշ դիտողություններ է արել։

Նշվում է, որ Կահիրեի հանդիպմանը չեն մասնակցել Սաուդյան Արաբիայի արտաքին գործերի նախարարը կամ Սաուդյան Արաբիայի անունից որևէ այլ ներկայացուցիչ։

Կահիրեի հանդիպումից հետո Եգիպտոսի արտաքին գործերի նախարարը հայտարարել էր, որ խմբի անդամները կրկին կհանդիպեն ՄԱԿ-ի Գլխավոր Ասամբլեայի 67-րդ նստաշրջանի շրջանակներում, որը բացվել է երեկ և կփակվի սեպտեմբերի 30-ին։

Կահիրեի հանդիպումից հետո Իրանի ԱԳՆ-ը հրապարակել է մի հայտարարություն, որտեղ նշված են Իրանի արտաքին գործերի նախարար Ալի Աքբար Սալեհիի՝ Իրանի Իսլամական Հանրապետության անունից Սիրիայի հարցով առաջ քաշած ճանապարհային քարտեզը, որը բաղկացած է 9 կետից։

Դրանք, մասնավորապես, ենթադրում են կոնֆլիկտի և բռնությունների դադարեցման մասին միաժամանակ երկկողմանի հայտարարում, ճգնաժամի խաղաղ կարգավորում առանց արտաքին միջամտության, զինված խմբավորումներին ֆինանսական, ռազմական և մարզումների տեսքով օգնության դադարեցում, բանակցությունների նախաձեռնում սիրիական կառավարության և ընդդիմության միջև, բոլոր շարժումների և խմբավորումների մասնակցությամբ ազգային հաշտեցման կոմիտեի ստեղծում, նշված չորս պետություններից դիտորդների ուղարկում Սիրիա՝ վերահսկելու համար բռնությունների կասեցման և բանակցությունների վարման գործընթացը, նպաստել արմատական բարեփոխումների գործընթացին։