Արգիշտի Քյարամյանի 10-րդ նշանակումը. արդյոք նրա վերջին հանգրվանն է

Այսօր հայտնի դարձավ, որ ՀՀ քննչական կոմիտեի նախագահ Հայկ Գրիգորյանը կազատվի զբաղեցրած պաշտոնից և նրա փոխարեն այդ պաշտոնին կնշանակվի ՔԿ նախագահի տեղակալ Արգիշտի Քյարամյանը: 

Նշենք, որ 30-ամյա Արգիշտի Քյարամյանը, 2018 թվականից առ այսօր հասցրել է 10 անգամ պաշտոնի նշանակվել, որից միայն հինգը` ԱԱԾ-ում և Քննչական կոմիտեում։

Քյարամյանը մասնագիտությամբ իրավաբան է, նախքան իշխանափոխությունը աշխատել է ՀՀ ոստիկանությունում, ապա՝ դատախազությունում։ Սակայն Արգիշտի Քյարամյանի բախտը ժպտացել է հենց Նիկոլ Փաշինյանի իշխանության օրոք: 

Մասնավորապես, 2018 հունիսի 8-ին Քյարամյանը նշանակվել է ՀՀ ԿԱ ՊԵԿ իրավախախտումների հայտնաբերման ու վարչական վարույթների իրականացման վարչության պետ, իսկ մեկ ամիս անց՝ ՊԵԿ հետաքննության վարչության պետ: 2019 փետրվարի 15-ից նա աշխատել է ՀՀ ՊԵԿ հետաքննության և օպերատիվ-հետախուզության վարչության պետի տեղակալ։ Այս նշանակումից 15 օր անց Քյարամյանը տեղափոխվել է նոր ձևավորված պետական վերահսկողական ծառայություն և նշանակվել ծառայության ղեկավարի օգնական։ Իսկ 2019 ապրիլի 10-ից ՀՀ վարչապետի որոշմամբ նշանակվել է ՀՀ պետական վերահսկողական ծառայության ղեկավարի տեղակալ և այս պաշտոնում մնացել մեկ տարի։ Նշանակումից 5 օր անց Քյարամյանը միաժամանակ զբաղեցրել է ծառայության պետի ժամանակավոր պաշտոնակատարի պաշտոնը: 2020 մայիսի 4-ին  Քյարամյանը ՊՎԾ-ից տեղափոխվել է քննչական ապարատ՝ 1 օրով նշանակվելով ՀՀ Քնչական կոմիտեի նախագահի տեղակալ։

Հաջորդ օրը ՀՀ նախագահի հրամանագրով նշանակվել է ՀՀ ԱԱԾ փոխտնօրեն, իսկ մեկ ամիս անց՝ հունիսի 8-ին նշանակվել ՀՀ ԱԱԾ տնօրեն։ Այս պաշտոնից Քյարամյանը ազատվել է Արցախյան երկրորդ պատերազմի ժամանակ՝  2020 թվականի հոկտեմբերի 8–ին։ Շուրջ երկու ամիս անգործ մնալուց հետո Քյարամյանը դարձյալ նոր պաշտոն է ստացել. 2020թ. դեկտեմբերի 24-ին նա կրկին նշանակվել է ՀՀ քննչական կոմիտեի նախագահի տեղակալ, սակայն այս անգամ հասցրել է ավելի երկար պաշտոնավարել՝ շուրջ յոթ ամիս։

Ուշագրավ է, որ Քյարամյանը ամենից երկար աշխատել է ՊՎԾ–ում, սակայն նրա պաշտոնանկություններից ամենից առեղծվածայինը շարունակում է մնալ ԱԱԾ տնօրենի պաշտոնից ազատումը, որը մինչև օրս չի մեկնաբանվել ո՛չ Նիկոլ Փաշինյանի, ո՛չ էլ իր կողմից: 

Ընդգծենք, որ պատերազմի օրերին ԱԱԾ տնօրենը նախընտրեց «մարտեր վարել» ռազմի դաշտում, քան մնալ թիկունքում և կատարել իր՝ ԱԱԾ տնօրենի պարտականությունները: 

Նրա՝ ԱԱԾ տնօրենի աշխատանքից ազատումը կապում են այն հանգամանքի հետ, որ պատերազմի ավարտից հետո «Ազգային անվտանգություն» կուսակցության նախագահ Գառնիկ Իսագուլյանը հայտարարեց՝ անձնագրային բաժանմունքների ղեկավարների միջոցով 1400 հայկական անձնագիր է բաժանվել հայերեն իմացող ադրբեջանցիների, ինչն ապահովել է ԱԱԾ-ն` այն ժամանակվա տնօրեն Արգիշտի Քյարամյանը:

Սակայն, հարց է առաջանում՝ ինչու Փաշինյանը որոշեց Քյարամյանին կրկին նշանակել պաշտոնի։ Ըստ շրջանառվող լուրերի` Քյարամյանը, պատերազմի օրերին գտնվելով Արցախում, տիրապետում է բազմաթիվ ինֆորմացիաներին և այս նշանակումով Փաշինյանը փորձում է հարաբերությունները չլարել նրա հետ, որպեսզի հարկ եղած դեպքում չբարձրաձայնի ներքին խնդիրների մասին։ 

Այսպիսով՝ համացանցային քննարկումներից պարզ էր դառնում, որ բոլորին հետաքրքրում էր երկու հարց, թե ինչո՞ւ է Արգիշտի Քյարամյանը պատերազմի ամենաթեժ օրերին ազատվել ԱԱԾ տնօրենի պաշտոնից և ինչո՞ւ հետո գործուղվեց Քննչական։ 

Հիշեցնենք, որ օրեր առաջ Արցախի նախագահի հրամանագրով Քյարամյանը պարգևատրվել է «Արիության մեդալով»՝ 44-օրյա պատերազմի մարտական գործողությունների ընթացքում ունեցած ավանդի և հայրենիքի պաշտպանության համար: