Chicago Tribune. American Airlines-ի օդաչուները բողոքի ցույց են կազմակերպել

American Airlines ամերիկյան ավիաընկերության օդաչուները ցույց են կազմակերպել հինգշաբթի օրը Չիկագոյի «Օհարա» օդանավակայանում՝ բողոքելով աշխատավարձերի և պարգևատրումների կրճատման դեմ, ինչը կապված է բիզնեսի վերակազմավորման հետ։ Ինչպես գրում է տեղական Chicago Tribune թերթը, բողոքի ակցիային մասնակցել է մոտ 200 օդաչու։ Նրանք կոչ են արել ընկերությանը միանալ մեկ այլ ամերիկյան ավիափոխադրողի՝ US Airway-ին։

American-ի օդաչուները ուզում են աշխատել դինամիկ և զարգացող ավիաընկերությունում, իսկ American–ի ինքնավար զարգացման ծրագիրը պարզապես չի աշխատում»,- ասել է Ամերիկյան քաղաքացիական օդաչուների ասոցիացիայի (Allied Pilots Association) ներկայացուցիչ Դենիս Թեջերը (Dennis Tajer):

Թերթը նշում է, որ ավելի վաղ ավիաընկերությունը ԱՄՆ-ում չեղյալ է հայտարարել հարյուրավոր չվերթներ՝ որպես պատճառ նշելով օդաչուների գործադուլը։ «Օհարայի» մասնակիցները իրենց հերթին այս մեղադրանքները հերքել են։

Հիշեցնենք, որ երեքշաբթի օրը Reuters-ը, վկայակոչելով American Airlines-ի մամլո խոսնակ Բրյուս Հիքսին, հաղորդել էր, որ ամերիկյան երրորդ ամենախոշոր ավիափոխադրողն իր բիզնեսի վերակազմակերպման ծրագրի շրջանակներում կարող է կրճատել մոտ 11 հազ. աշխատակցի։ Բացի այդ՝ ըստ գործակալության՝ սեպտեմբեր-հոկտեմբեր ամիսներին American Airlines-ը մտադիր է մինչև 1-2%-ով նվազեցնել չվերթների քանակը։