Der Spiegel. Սահակաշվիլիի քաղաքական հեղինակությունը վտանգված է

Վրաստանի գործող նախագահ Միխայիլ Սաակաշվիլիի և նրա հիմնական հակառակորդ Բիձինա Իվանիշվիլիի միջև պայքարն աննախադեպ սրվել է: Բռնության տեսարանները բացահայտող տեսահոլովակները, որոնք եթերում հայտնվեցին ընտրություններից երկու շաբաթ առաջ, սասանել են Սաակաշվիլիի հեղինակությունը. գրում է թերթը:

Այդ դեպքի շուրջ ստեղծված սկանդալը լրջորեն վնասում է Սաակաշվիլիի հեղինակությանը, հատկապես, որ վերջինս Վրաստանում համարվում է բարեփոխիչ: Ինչպես հայտնի է, 2003թ. վարդագույն հեղափոխության առաջնորդն առանձնանում է արևմտամետ հայացքներով, ով լուրջ բարեփոխումներ անցկացրեց Վրաստանի արդարադատության, իրավապաշպանության և վարչական ոլորտներում: «Այն ժամանակ Վրաստանում աշխատանքից ազատվեցին ոչ միայն իրավապահ համակարգի բոլոր աշխատակիցները, այլև հազարավոր դատավորներ և պաշտոնյաներ»: Նման միջոցներով Սաակաշվիլին փորձում էր հաղթահարել կաշառակերությունն ու կամայականությունները իրավապահ համակարգում:

Մինչ այդ հոլովակի տարածումը համարվում էր, որ Սաակաշվիլիին հաջողվել է հաղթահարել կոռուպցիան երկրում: Վրաստանը նույնիսկ բարձրացել էր մինչև 64-րդ հորիզոնականը քիչ կոռումպացված երկրների ցուցակում՝ իր հետևում թողնելով Իտալիային:

Ներկայումս Սաակաշվիլիի ամենալուրջ քաղաքական հակառակորդը միլիարդատեր Իվանիշվիլին է, որի հաղթանակը սպասվելիք ընտրություններում ըստ Fors գործակալության հավանական է համարվում 49 %–ով, մինչդեռ Սաակաշվիլիինը` 43%–ով: