Սևանի հարկայինն այսուհետ կգործի նոր երկհարկանի կառույցում

Դեռևս տարեսկզբին պետական եկամուտների կոմիտեն 2011-ը հայտարարել է սպասարկման որակի բարելավման տարի: Կոմիտեի նախագահի հանձնարարականով հարկային տեսչությունների առջև խնդիր է դրվել հարկ վճարողների սպասարկման մակարդակը համապատասխանեցնել միջազգային չափանիշներին: Սպասարկման որակի բարելավմանն ուղղված կարևորագույն քայլերից մեկը՝ տեսչություններում ժամանակակից սպասարկման կենտրոնների գործարկումն է:

Տարեվերջին արդեն կարող ենք արձանագրել, որ 2011-ի ընթացքում հարկային տեսչություններում բացված ժամանակակից սպասարկման կենտրոնների գործունեությունն արդարացված է: Երևանում արդեն իսկ 5 այդպիսի սրահ կա՝ Կենտրոնի և Մյասնիկյանի հարկային տեսչություններում, Արաբկիրի և Խոշոր հարկ վճարողների տեսչություններում և Էրեբունու, Նոր Նորքի, Շենգավիթի հարկային տեսչություններում:

Հարկ վճարողներին միջազգային չափանիշներով սպասարկումն իրողություն է նաև մարզերում. Վանաձորի տարածաշրջանային սպասարկման առաջին կենտրոնին հաջորդում է Սևանի տարածքային հարկային տեսչության սպասարկման նորաոճ սրահը՝ դրանով իսկ բոլորովին նոր մակարդակի բերելով տարածքային համաչափ զարգացումը նաև հարկային ոլորտում. հարկային գրասենյակները, որպես մեկ միասնական տեղեկատվական համակարգ, սկզբունքը Սևանի ՏՀՏ-ում ևս պահանջարկված են:

ՊԵԿ նախագահ Գագիկ Խաչատրյանը հարկային տեսչությունների առջև խնդիր է դրել՝ նմանատիպ սպասարկման կենտրոնների հիմնական նպատակադրումը շատ հստակ պետք է լինի. հասնել նրան, որ անկախ տարածաշրջանային պատկանելությունից, հնարավոր լինի ՊԵԿ-ի ցանկացած սպասարկման կենտրոնում՝ գրասենյակում իրականացնել հարկային և մաքսային ծառայությունների հետ կապված ցանկացած ընթացակարգ: Օրինակ՝ Գեղարքունիքի կամ հարակից մարզերի հարկ վճարողները նոր գաղափարի իրագործման շնորհիվ կկարողանան հենց Սևանից ներկայացնել հաշվետվություն կամ համապատասխան փաստաթղթեր ուղարկել առանց մաքսատներ կամ մաքսակետեր այցելելու:

Սևանի տարածքային հարկային տեսչության սպասարկման նորաբաց կենտրոնի աշխատանքներին ծանոթանալու նպատակով Գեղարքունիքի մարզ է այցել պետական եկամուտների կոմիտեի նախագահ Գագիկ Խաչատրյանը: Նշենք, որ մինչև հիմնովին վերանորոգված նոր շենք տեղափոխվելը, տեսչությունը գործում էր Սևանի քաղաքապետարանի շենքում: Այժմ Սևանի հարկայինը հարկ վճարողներին ներկայանում է միջազգային չափանիշներին համապատասխան նոր՝ երկհարկանի կառույցով, որի շինարարական աշխատանքները սկսվել են այս տարվա գարնանը: Շենքի առաջին հարկում տեղակայված է նորաոճ սպասարկման սրահը՝ հարմարավետ աշխատասենյակներով՝ համալրված ժամանակակից համակարգչային տեխնիկայով և անհրաժեշտ այլ պարագաներով՝ դրանով իսկ ավելի հեշտացնելով հարկ վճարողների աշխատանքն ու ելումուտը: Բարեփոխումների արդյունքում հարկ վճարողների սպասարկումն իրականացվում է «մեկ պատուհանի» սկզբունքով: Տեսչություն այցելելիս հարկատուներն այլևս ստիպված չեն լինի իրենց հուզող հարցերը պարզաբանելու կամ խնդիրներին լուծում տալու համար ավելորդ ժամանակ և միջոցներ վատնել՝ սենյակից սենյակ, հարկից հարկ անցնելով, այլ ցանկացած պատուհանից միանգամից կկարողանան սպառիչ պատասխան ստանալ: Արդյունքում՝ էապես նվազեցվում է հարկային տեսուչ-հարկատու շփումը: Սպասարկման կենտրոնի միջոցով է իրականացվում հարկատուների հետ տարվող աշխատանքի մոտ 90 տոկոսը, այդպիսով՝ շփումը տեսչության մյուս ստորաբաժանումների հետ հասցվում է նվազագույնի: Ինչպես Երևանի տեսչությունների սպասարկման սրահներում, այստեղ ևս այցելուներին հասանելի տեղում տեղադրված է տեղեկատվական տերմինալ, հայտարարությունների ցուցատախտակ, գովազդային հոլովակների մոնիտոր, որոնք իրենց հերթին նույնպես կնպաստեն հարկ վճարողների իրազեկման մակարդակի բարձրացմանը: Այսպիսով, Սևանի տարածքային հարկային տեսչությունում գործող նորաբաց սպասարկման կենտրոնում ևս ստեղծված են բոլոր պայմանները հարկ վճարողներին արագ և որակյալ սպասարկելու համար:

Կոմիտեի ղեկավարությունը հետևողական է հարկ վճարողների սպասարկումը միջազգային չափանիշներին համապատասխանեցնելու հարցում: Տարածաշրջաններում նույնպես հարկային գրասենյակների՝ որպես մեկ միասնական տեղեկատվական կենտրոնի գործարկումը միանշանակ կնպաստի մարզերում սպասարկման որակի բարելավմանը: Բարեփոխումների օրակարգում մյուս տեսչություններն են: