Այս տարի ամանորյա գնաճը կլինի անհամեմատ ավելի մեղմ՝ 5-7 տոկոս

Այսօր «Արցախ» ակումբում Հայաստանի սպառողների միության նախագահ Արմեն Պողոսյանը լրագրողների հետ հանդիպմանը հայտնեց, որ իր կարծիքով, նախորդ տարվա համեմատ, այս տարի ամանորյա գնաճը կլինի անհամեմատ ավելի մեղմ՝ 5-7 տոկոս: «Շատ են հարցնում, թե որքան կլինի այս տարվա գնաճը: Ես գուշակող չեմ, չեմ կարող ստույգ ասել, բայց կարծում եմ, որ մեղմ կլինի»,- նշեց Ա. Պողոսյանը՝ ելնելով նախորդ տարվա աննախադեպ գնաճի կրկնման անհնարինության ենթադրությունից: Նրա խոսքերով՝ 5-7 տոկոսի այդ գնաճն արդեն իսկ նկատվում է:

Ըստ միության նախագահի՝ այժմ իրենց խնդիրը դրան դիմագրավելն է: «Կա երկու խնդիր՝ նախ գների վերահսկողությունը և սանձումը և մենաշնորհների վերահսկողությունը և սանձումը: Հաճախ պետական մարմիններն ուզում են այդ խնդիրներն առանձին ներկայացնել: Ամեն մեկն իր ֆունկցիաները ուզում է սահմանափակել և մեղավորներին այլ տեղ որոնել, իսկ դրանք իրար հետ անխախտ կապված են, և մեկը մյուսի հետևանքն է», - նշեց բանախոսը: Միության նախագահի խոսքերով, այժմ շուկայում կան ձեռնարկություններ, որոնց մենաշնորհը ծածկում է դաշտի 70 տոկոսը, մինչդեռ 30 տոկոս զբաղեցնելն արդեն իսկ պատժելի է: Ա. Պողոսյանը նշեց, որ երբևէ չի կարող լինել պայքար ազնիվ մրցակության ուղղությամբ, որը չանդրադառնա գների վրա և հակառակը. եթե մենք տեսնում ենք հակաօրինական, ստվերային երևույթներ՝ դրանց դեմ պայքարելով միայն հնարավոր կլինի ապահովել պատշաճ, օրինական մրցակցություն: